फाइनान्स कम्पनीका प्रमुख कार्यकारी अधिकृतहरुको संस्था नेपाल वित्तीय संस्था संघले पनि ब्याजदर घटाउने भएको छ । संघका अध्यक्ष सरोजकाजी तुलाधारले आगामी बैठकबाट ब्याजदर घटाउने बताएका हुन् ।
ब्याज घटाएपनि बैंकर्स संघको जस्तो खुला भने नगर्ने उनले बताए । यद्यपि ब्याज भने घटाउने उनले बिजपाटीलाई जानकारी दिए ।
नेपाल बैंकर्स संघले ब्याजदर तोक्ने अधिकार बैंकहरुलाई नै दिएसंगै विकास बैंक र फाइनान्सहरुले के गर्छन् भन्ने चासो बढेको छ। यता विकास बैंकहरुको संस्था डेभलपमेन्ट बैंकर्स एसोसियनले ब्याजदरबारे निर्णय गर्न शुक्रबार बैठक डाकेको छ ।
मुक्तिनाथ विकास बैंकका अध्यक्ष तथा डेभलपमेन्ट बैंकर्स एसोसियनका इमिडियट पास्ट प्रेसिडेन्ट प्रद्युमन पोखरेलले शुक्रबार बस्ने बैठकले ब्याजदर बारे निर्णय गर्ने बताएका हुन् । उनले वित्तीय बजारमा स्थायित्व हुने गरि ब्याज निर्धारण गरिने बताए । उनले ब्याजदर खुला छोड्ने वा संघले नै तोक्ने भन्ने बारे शुक्रबारको बैठकले निर्णय गर्ने बताए ।
बैंकर्स संघ हस्तक्षेप अन्त्य
आज बसेको बैंकर्स संघको बैठकले यस अघि हुँदै आएको भद्र सहमति अन्त्य गर्दै बैंकहरु आफैले ब्याज निर्धारण गर्ने सक्ने गरि निर्णय गरेको छ। यस अघि बैंकर्स संघले ब्याज निर्धारण गर्ने गरेकोमा अब भने बैंकहरुले राष्ट्र बैंकले दिएको सीमा भित्र रहेर आफै आवश्यकताका आधारमा ब्याज निर्धारण गर्ने छन् । यसो हुँदा बैंकहरुको ब्याज फरक फरक हुन सक्ने छ। यो व्यवस्था साउन १ देखि लागु हुने छ । राष्ट्र बैंकको निर्देशन अनुसार व्यक्तिगत मुद्दति निक्षेपमा दिँदै आएको अधिकतम ब्याजदरको औसतको १० प्रतिशत सीमाभित्र रहेर निक्षेपको ब्याजदर घटाउन वा बढाउन सकिने व्यवस्था छ।