बैशाख ६ गतेदेखि एक साथ २ वटा कम्पनीले आईपिओ निष्काशन गर्ने भएका छन् । २ कम्पनीले सर्वसाधारणलाई कुल १ अर्ब ५७ करोड ३८ लाख १५ हजार रुपियाँ बराबरको शेयर निष्काशन गर्न लागेका हुन् । जनताको जलविद्युत आयोजनामा पछिल्लो समय थपिएका रसुवागढी हाइड्रोपावर र सान्जेंन जलविद्युत कम्पनीले एक साथ बैशाख ६ गतेदेखि शेयर निष्काशन गर्न लागेका हुन् ।
रसुवागढी हाइड्रोपावर कम्पनी लिमिटेड
रसुवागढी हाइड्रोपावर कम्पनी लिमिटेडले बैशाख ६ गतेदेखि सर्वसाधारणलाई आईपीओ निष्काशन गर्ने भएको छ । कम्पनीले रसुवागढी जलविद्युत् कम्पनी लिमिटेडले एक अर्ब दुई करोड ६३ लाख १५ हजार बराबरको एक करोड दुई लाख ६३ हजार १५० कित्ता आईपिओनिष्काशन गर्न लागेको हो । जस मध्ये ४ प्रतिशत अर्थात् ४ लाख १० हजार ५ सय २६ कित्ता कमर्चारीको लागि र ५ प्रतिशत अर्थात् ५ लाख १३ हजार १ सय ५७ कित्ता शेयर सामुहिक लगानी कोषको लागि बाँडफांड गरिएको छ । बाँकि रहेको ९३ लाख ३९ हजार ४ सय ६७ कित्ताको लागि सर्वसाधारणले आवेदन दिन सक्ने छन् ।
कम्पनीको आईपिओमा छिटोमा बैशाख १० गते र त्यस समयसम्म पर्याप्त आवेदन नपरेको खण्डमा जेठ ५ गतेसम्म आवेदन दिन सकिने छ । आवेदन दिंदा प्रति कित्ता एक सय रुपियाँको दरले न्युनतम ५० कित्ता र अधिकतम ५ हजार कित्तासम्मको लागि आवेदन दिन सक्ने छन् । यसमा आयोजना प्रभावित बासिन्दाहरुले र यस अघि कम्पनीका शेयर खरिद गरिसकेकाले आवेदन दिन पाउने छैनन् । शेयर निष्काशनको लागि सिद्धार्थ क्यापिटल बिक्रि प्रबन्धक रहेको छ भने एनआईबिएल एस क्यापिटल, ग्लोबल आईएमई क्यापिटल र सनराइज क्यापिटल सहायक बिक्रि प्रबन्धक रहेका छन् ।
कम्पनीको आईपिओले ४ प्लसको रेटिग पाएको छ । यसले औसत भन्दा कम आधारहरु रहेको जनाउछ । रसुवामा १ सय ११ मेगावाटको आयोजना निर्माण गरिरहेको यस कम्पनीको प्रति मेगावाट लागत १५ करोड १२ लाख १२ हजार रहेको छ भने कम्पनीले ७६ साल फागुन ७ गतेदेखि बिद्युत उत्पादन गर्ने लक्ष्य लिएको छ ।
सान्जेंन जलविद्युत कम्पनी लिमिटेड
सान्जेंन जलविद्युत कम्पनी लिमिटेडले पनि बैशाख ६ गतेदेखि सर्वसाधारणलाई आईपीओ निष्काशन गर्ने भएको छ । कम्पनीले ५४ करोड ७५ लाख बराबरको ७४ लाख ७५ हजार कित्ता शेयर निष्काशन गर्न लागेको हो । जस मध्ये ५ प्रतिशत अर्थात् २ लाख ७३ हजार ७ सय ५० कित्ता सामुहिक लगानी कोषको लागि र ४ प्रतिशत अर्थात् २ लाख १९ हजार कम्पनीका कर्मचारीको लागि सुरक्षित गरिएको छ । बाँकि रहेको ४९ लाख ८२ हजार २ सय ५० कित्ताको लागि सर्वसाधारणले आवेदन दिन सक्ने छन् ।
कम्पनीको आईपिओमा छिटोमा बैशाख १० गते र त्यस समयसम्म पर्याप्त आवेदन नपरेको खण्डमा जेठ ५ गतेसम्म आवेदन दिन सकिने छ । आवेदन दिंदा प्रति कित्ता एक सय रुपियाँको दरले न्युनतम ५० कित्ता र अधिकतम २ हजार कित्तासम्मको लागि आवेदन दिन सक्ने छन् । यसमा आयोजना प्रभावित बासिन्दाहरुले र यस अघि कम्पनीका शेयर खरिद गरिसकेकाले आवेदन दिन पाउने छैनन् । शेयर निष्काशनको लागि नागरिक लगानी कोष बिक्रि प्रबन्धक रहेको छ भने एनएमबि क्यापिटल र सनराइज क्यापिटल सहायक बिक्रि प्रबन्धक रहेका छन् ।
कम्पनीको आईपिओले ४ प्लसको रेटिग पाएको छ । यसले औसत भन्दा कम आधारहरु रहेको जनाउछ । रसुवामा निर्माणाधीन अवस्थामा रहेका साञ्जेनका दुई वटा आयोजना छन् । त्यसमा माथिल्लो साञ्जेनको क्षमता १४ दशमलव आठ मेगावाट रहेको छ भने साञ्जेनको क्षमता ४२ दशमलव पाँच मेगावाट छ । यस कम्पनीको प्रति मेगावाट लागत १५ करोड रहेको छ ।
