साताको अन्तिम दिन बिहीबार पनि सेयर बजार परिसुचक नेप्से बढेको छ । बुधबार २०.६७ अंकले बढेको नेप्से आज ९.८७ अंकले बढेर १ हजार ८ सय ६०.२० को बिन्दुमा बजार बन्द भएको हो । पछिल्लो दुई दिनमा नेप्से ३० अंकले बढेको छ ।
नेप्से सुचक बढेपनि आज नबिल बैंकको सेयर मुल्यमा उच्च गिरावट आएको छ । बैंकको सेयर मुल्यसर्वाधिक ८.२० प्रतिशत अर्थात प्रतिकित्ता ४६ रुपैयाँले घटेर ५१५ रुपैयाँ कायम भएको छ । बैंकको १३ करोड १० लाख रुपैयाँ बढीको सेयर किनबेच भएको छ ।
नबिल बैंकले आज मात्रै २०७९/८० को संचित मुनाफाबाट वितरण गर्ने लाभांश प्रस्ताव गरेको थियो । जस अनुसार बैंकले हाल कायम चुक्ता पूँजीको ११ प्रतिशत (कर सहित) ले हुन आउने नगद लाभांश वितरण गर्नेछ । बैंकले प्रति शेयर ११ रुपैयाँ लाभांश वितरण गर्ने प्रस्ताव गरेको हो । विगतका वर्षहरुको तुलनमा निकै कम लाभांश घोषणा गरेसँगै बैंकको सेयर मुल्यमा गिरावट आएको हो ।
नेप्सेका अनुसार आज १६१ कम्पनीको शेयर मूल्य बढेको छ भने ६७ कम्पनीकोे घटेको छ र १० वटा कम्पनीको शेयरमूल्य स्थिर छ ।
यसदिन उच्च वृद्धि हुने तीन कम्पनीमा जलविद्युत समूहका कम्पनी रहेका छन् । जसमध्ये बुद्धभूमि नेपाल हाइड्रोपावरको सेयर मुल्यमा ९.९७ प्रतिशतले बढेर प्रतिकित्ता मूल्य ३४८ रुपैयाँ ५० पैसा पुगेको छ । त्यस्तै थ्रीस्टार हाइड्रोको सेयर मुल्य ८.५८प्रतिशत र सिक्लेस हाइड्रोपावरको सेयर मुल्य ८.५४ प्रतिशतले बढेको छ ।
