विमानस्थल निर्माणका लागि आवश्यक पर्ने जग्गा खरीदमा ठूलो परिमाणको बजेट खर्च हुने गरेको पाइएको छ। नेपाल नागरिक उड्डयन प्राधिकरणले गत आर्थिक वर्षमा जग्गा प्राप्ति र मुआब्जा वितरणमा मात्रै १४ अर्ब १८ करोड ५४ लाख ४२ हजार रुपैयाँ खर्च गरेको हो।
चालू आर्थिक बर्षमा आठ अर्ब ५५ करोड २५ लाख रुपैयाँ जग्गा प्राप्तिका लागि विनियोजन गरिएको छ। यी तथ्य तथा तथ्याङ्कले विमानस्थल निर्माणका लागि आवश्यक जग्गा प्राप्तिमा मोटो रकम खर्च गर्नुपर्दा निर्माण थप महँगो र जटिल बन्दै गएको छ। प्राधिकरणले चालू आवका लागि ४५ अर्ब १७ करोड ५६ लाख ९५ हजार रुपैयाँ विनियोजन गरेको छ।
प्राधिकरणका उपमहानिर्देशक राजन पोखरेल जग्गा प्राप्ति र मुआब्जाका लागि बढी खर्च भइरहेको स्वीकार्छन्। उनले भने “प्राधिकरणले आन्तरिक विमानस्थलमा खर्च गरिरहेको छ । सञ्चालन खर्च उठाउन नै समस्या परेको छ । राज्यको दायित्वअनुसार पनि कतिपय स्थानमा लगानी गरिएको छ ।” गत आवमा त्रिभुवन अन्तर्राष्ट्रिय विमानस्थल विस्तारका लागि कोटेश्वरतर्फ पाँच अर्ब मुआब्जा वितरण गरिएको थियो। स्थानीयवासीले मुआब्जा बुझे पनि चित्त बुझाउन सकेका छैनन्।
यस्तै गौतमबुद्ध विमानस्थलका लागि गत आवमा १३ अर्ब ६१ करोड विनियोजन गरिएको थियो । सो विमानस्थलको भौतिक प्रगति ५० प्रतिशतभन्दा माथि पुगेको छ। आगामी दश महीनाभित्र सो विमानस्थल सञ्चालनमा ल्याउने तयारी गरिएको छ । पोखरा विमानस्थलका लागि एक अर्ब २० करोड, विराटनगर विमानस्थल विस्तार गर्न थप जग्गा प्राप्तिका लागि १५ करोड, झापाको चन्द्रागिरि विमानस्थल विस्तारका लागि ३० करोड, जनकपुर विमानस्थलका लागि पाँच करोड, डोल्पा विमानस्थलका लागि ३० लाख रुपैयाँ विनियोजन गरिएको छ। सरकारले क्षेत्रीय रुपमा सञ्चालनमा रहेका विमानस्थलको स्तरोन्नति तथा थप विस्तार गर्ने नीति लिएकाले थप बजेट विनियोजन गरिएको हो।
प्रदेश नं १ सरकारले विराटनगर विमानस्थललाई थप विस्तार गर्ने नीति लिएको छ। छिमेकी देशमा समेत उडान भर्न सक्ने गरी सो विमानस्थलको स्तरोन्नति गर्न लागिएको हो। सञ्चालनमा रहेको नेपालगञ्ज विमानस्थलको स्तरोन्नति भइरहेको छ। सुर्खेत विमानस्थल स्तरोन्नति गर्ने लक्ष्य छ। हवाई पहुँच तथा सेवालाई थप विस्तार गर्ने लक्ष्यका साथ सञ्चालनमा रहेका विमानस्थलाई साधन स्रोत सम्पन्न बनाउन लागिएको हो।
यस्तै आन्तरिक विमास्थल निर्माणका लागि प्रस्ताव गरिएको काभ्रेपलाञ्चोकको नागी डाँडामा जग्गा प्राप्तिका लागि २५ करोड छुट्याइएको छ । जग्गा खरीद तथा विकास शीर्षकमा देशका ठूला तथा मझौला विमानस्थल निर्माण गर्न जग्गाको मुआब्जाका लागि उक्त परिमाणको खर्च गरिएको हो। सबैभन्दा बढी त्रिभुवन अन्तर्राष्ट्रिय विमानस्थलको कोटेश्वरतर्फको क्षेत्र विस्तार गर्न पाँच अर्ब खर्च भएको छ । पोखरा क्षेत्रीय विमानस्थलका लागि गत आवमा एक अर्बभन्दा बढी विनियोजन गरिएको भए पनि १०.५ प्रतिशत मात्रै खर्च गरिएको छ।
यस्तै निजगढ दोस्रो अन्तर्राष्ट्रिय विमानस्थलको जग्गा प्राप्तिका लागि रु ८४ करोड विनियोजन गरिएको थियो । यस्तै धावन मार्ग, ट्याक्सी बे तथा एप्रोन निर्माणमा एक अर्ब ५५ करोड ४९ लाख ६३ हजार विनियोजन गरिएको छ। भवन निर्माण शीर्षकमा २९ करोड ६५ लाख, परामर्श तथा सल्लाहमा १८ करोड ३० लाख ७० हजार विनियोजन गरिएको थियो। प्राधिकरणले बिजुली तथा पानीमा मात्रै १३ करोड १९ लाख ६५ हजार रुपैयाँ खर्च गरेको छ। सपोर्ट प्रणाली उपकरणमा १० करोड ३७ लाख ४५ हजार, अन्य सेवातर्फ ९७ करोड २३ लाख ५९ हजार, एप्रोन सडक निर्माणमा ९६ करोड ९१ हजार, यान्त्रिक उपकरणमा सात करोड ५४ लाख ८६ हजार र सरसफाइमा सात करोड ५१ लाख १४ हजार खर्च गरिएको छ। संस्कृति पर्यटन तथा नागरिक उड्डयन मन्त्रालयका प्रवक्ता घनश्याम उपाध्याय नागरिकको सामाजिक उत्तरदायित्व पूरा गर्न सरकारले विमानस्थल निर्माणमा ठूलो खर्च गर्नुपरेको बताउँछन्। रासस
