नेपाल राष्ट्र बैंकका पाँच कार्यकारी निर्देशकको जिम्मेवारी हेरफेर भएको छ । राष्ट्र बैंक स्रोतका अनुसार राष्ट्र बैंकको निकै शक्तिशाली विभाग मानिने बैंक तथा वित्तीय संस्था नियमन विभागको जिम्मेवारी कार्यकारी निर्देशक गुरु पौडेललाई दिइएको छ ।
बैंक तथा वित्तीय संस्थाको नियमन बिभागलाई बैंक, विकास बैंक, फाइनान्स र लघुवित्तलाई नियमन गर्ने अधिकार दिईएको हुन्छ ।
त्यस्तै गुरु पौडेल रहेको भुक्तानी प्रणाली विभागमा डा. गुणाकर भट्टलाई नियुक्त गरिएको छ । भट्ट यसअघि बैंक तथा वित्तीय संस्था नियमन विभागमा थिए । भुक्तानी प्रणाली विभागमा तानिएका डा भट्ट नेपाल राष्ट्र बैंकका प्रवक्ता समेत हुन् ।
त्यसैगरी, विदेशी विनिमय विभागका कार्यकारी निर्देशक रामु पौडेलको वित्त व्यवस्थापन विभागको जिम्मेवारी दिइएको छ । पौडेलले सम्हालेको विदेशी विनिमय विभागमा तुलसी प्रसाद घिमिरेलाई ल्याइएको छ । तुलसी प्रसाद घिमिरे यस अघि मानव शंसाधन विभाग प्रमुख थिए ।
वित्त व्यवस्थापन विभाग प्रमुख रहेका कार्यकारी निर्देशक मुकुन्द कुमार क्षेत्रीलाई मानव शंसाधन विभाग प्रमुखमा सरुवा गरिएको छ।
