विलासिता कर उठाउन थालिएको पहिलो महिनामा सरकारले सवा करोड कर संकलन गरेको छ । आन्तरिक राजस्व विभागका अनुसार चालु आर्थिक वर्षको पहिलो महिना अर्थात् २०८० साउन महिनामा विभिन्न क्षेत्रबाट १ करोड २३ लाख विलासिता कर संकलन गरेको जनाएको छ।
विभागका अनुसार पाँच तारे र सो भन्दा माथिका होटल तथा लक्जरी रिसोर्ट, आयातित मदिरामा, दश लाख रूपैयाँभन्दा बढी मूल्यका हिरा, मोती, पत्थर जडित सुन वा बहुमूल्य धातुका गरगहना मार्फत उक्त कर संकलन भएको हो । अर्थमन्त्री डा. प्रकाश शरण महतले चालु आर्थिक वर्षको बजेटमार्फत पहिलोपटक नेपालमा विलासिताको करको व्यवस्था गरेका थिए ।
के हो विलासिता कर ?
सरकारले आर्थिक वर्ष २०८०/८१ को आर्थिक विधेयक मार्फत विलासिता कर संकलन गर्न थालेको हो । पाँच तारे र सो भन्दा माथिका तारे होटल तथा लक्जरी रिसोर्टले प्रदान गर्ने सेवा, आयातित मदिरा, र दश लाख रूपैयाँभन्दा बढी मूल्यका हिरा, मोती, पत्थर जडित सुन वा बहुमूल्य धातुका गरगहनामा विलासिता कर लाग्ने व्यवस्था गरिएको छ। यी वस्तु तथा सेवाको खरिद रकममा दुई प्रतिशतका दरले विलासिता शुल्क लाग्ने व्यवस्था छ ।
कसले तिर्छ कर ?
पाँच तारे र सो भन्दा माथिका होटल तथा लक्जरी रिसोर्टले सेवा प्रदान गरेको बखत, आयातित मदिरामा पैठारी हुने भन्सार बिन्दुमा पैठारीका बखत, र दश लाख रूपैयाँभन्दा बढी मूल्यका हिरा, मोती, पत्थर जडित सुन वा बहुमूल्य धातुका गरगहना बिक्रेताले बिक्रीका बखत विलासिता कर तिर्नु पर्ने व्यवस्था छ।
कहिले तिर्ने ? नतिरे के हुन्छ ?
विलासिता शुल्क बापत सङ्कलन गरेको रकम अर्को महिनाको पच्चीस गतेभित्र राजस्व खातामा जम्मा गरी सोको विवरण सहितको जानकारी सम्बन्धित राजस्व कार्यालयमा पठाउनु पर्ने व्यवस्था छ । कुनै व्यक्तिले विलासिता शुल्क बापतको रकम दाखिल नगरेमा वार्षिक पन्ध्र प्रतिशतका दरले ब्याज लगाई असुल गरिने व्यवस्था छ।
