प्रतिनिधिसभा र प्रदेशसभा सदस्य चयनका लागि आज मतदान भएको छ । मतदानका लागि तोकिएको समय सकिएको छ ।
निर्वाचन आयोगले आज बिहान ७ बजेदेखि साँझ ५ बजेसम्म मतदानको समय तोकेको थियो । देशका अधिकांश स्थानमा मतदान सम्पन्न भएको निर्वाचन आयोगले जनाएको छ ।
५ बजेसम्म मतदानस्थल भित्र प्रवेश गरिसकेका मतदाताहरुले केही अबेरसम्म पनि मतदान गर्न पाउनेछन् । केही मतदानस्थलमा विवादका कारण रोकिएको मतदान पनि अबेर गरी सुरु भएको छ ।
दोलखा, बाजुरा, सिरहा, नवलपरासी, स्यांजा, बागलुङ पूर्व लगायतका स्थानमा मतदान रोकिएको थियो । केही केन्द्रमा मतदान सुचारु भएको छ भने केहीमा बाँकी छ ।
मतदान सकिएका स्थानबाट मतपेटिका संकलनको काम भइरहेको छ । प्रमुख निर्वाचन आयुक्त दिनेश कुमार थपलियाले आज रातीबाटै मतगणना सुरु गर्ने जानकारी दिएका छन् ।
दुर्गम हिमाली क्षेत्रमा भने मतपेटिका संकलन गर्न समय लाग्ने भएकाले सोमबारबाट मात्रै मतगणना गरिनेछ ।
