Election 2079 Worldcup 2022

जहाँ दुई रुपैयाँ बचाउन २ घण्टा लाइन बस्छन् नेपाली

बिजपाटी संवाददाता

बिजपाटी संवाददाता

Oct 02, 2022 | 11:41:16 AM मा प्रकाशित

laxmi bank

चाडपर्व सुरु भएसँगै भारतीय बजारमा किनमेलका लागि नेपालीहरूको भरिभराउ छ । विगत वर्षहरूमा जस्तै यस बर्षपनि नेपालीहरू किनमेलका लागि भारतीय बजार सम्म पुगेका हुन् । कैलाली र कञ्चनपुरबाट नजिकै रहेका भारतीय बजार बनगाँउ, तिकुनीया, कजरीया पलिया, सुडा तथा बनबाँसामा किनमेलका लागि नेपालीहरू पुग्ने गरेका हुन् ।

धनगढी बजार भन्दा केही सस्तोमा सामान पाइने भन्दै धेरै उपभोक्ता भारतीय बजारसम्म पुग्ने गरेको बताउँछन् । चाडपर्व सुरु भएसँगै थुप्रै नेपालीहरू नजिकै रहेको भारतीय बजारमा जाने गरेका हुन् । गौरीफन्टानाका हुँदै उनीहरू भारतीय बजारमा खाद्यान्न, दाल, चिनी देखि लत्ताकपडा किन्न जाने गरेका हुन् ।  

धनगढी ०३ विशालनगरकी सुशिला कार्कीले केही सामान सस्तो पाइने भएपछि दसैंको समान किन्न वनगाउँ बजार आएको बताइन् ।

नेपालभन्दा भारतीय बजारमा सामान सस्तो पाइने भएकाले उतै जाने गरेको उनी बताउँछिन् ।  ‘चिनी, दाल, कपडा धनगढी बजारको भन्दा केही सस्तो पाइन्छ’, उनले भनिन् ।

चाडपर्व आएपछि वनगाउँ बजारसम्म पुग्ने गरेको उनको भनाइ छ । धनगढी ७ की सबिना चौधरीले पनि दसैंमा बच्चाहरूका लागि तथा घरपरिवारको लागि लुगा किन्न बनगाउँ बजार गएको बताइन् । ‘धनगढीमा एक हजार पर्ने सुटलाई चार, पाँच सय सम्म दिन्छन्’, उनले भनिन् । 

सस्तो कपडा पाइने भएपछि साथीहरूसँग वनगाउँ बजार आएको उनले बताइन् । धनगढी बजारमै सस्तोमा सामान पाइने भइदिए दुःख गरेर भारतीय बजार सम्म पुग्नु नपर्ने उनको भनाइ छ ।  दसैंमा मात्र होइन तिहार, छठ तथा विवाह भोजका लागि सामान किन्नु पर्ने भएमा धेरै नेपालीहरू भारतीय बजारमा जाने गरेका छन् । 

धनगढी उपमहानगरपालिका ३ का राजु कटुवाल भने पैसा बचाउन बनगाउँ जाने गरेको पक्षमा छैनन् । उनी भन्छन्,‘कहिले २० रुपैयाँ जोगाउन ३० मिनेट हिँड्नुपर्छ, कहिले ३० मिनेट जोगाउन २० रुपैयाँ  तिर्नुपर्छ । नत पैसा ठुलो नत समय नै । सबैभन्दा ठुलो आवश्यकता हो ।´ 

उनले पैसा बचाउन भन्दा पनि फराकिलो बजारमा मनलाग्दो चिज किन्न सकिने भएर जाने गरेको हुनसक्ने बताए । दसैंको सामाग्री किनमेल गर्न नेपालीहरु दैनिक हजारौंको संख्यामा भारतीय बजार जानेको भिड छ ।

केही रुपैयाँ सस्तो सामान पाउने भन्दै नेपालीहरू भारतीय बजार जान्छन् । तर गुणस्तरमा ध्यान दिँदैनन् ’, किराना व्यवसायी संघ कैलालीका अध्यक्ष लक्ष्मण राज पन्तले बताए । ‘हामीले भन्सार कर तिरेर सामान ल्याउने हुँदा केही महङ्गो हुन्छ, तर ग्राहकलाई मार पर्ने गरी महङ्गो हुँदैन,’ उनले भने  । अखाद्य बस्तुहरू नेपालीहरूले उपभोग गर्न बाध्य हुने गरेको उनको भनाई छ । चिनी मात्रै केही सस्तोमा पाइने भएपनि अन्य बस्तुको मुल्यमा  खासै फरक नरहेको उनले बताए । ‘नेपाली बजारमा चिनीको मूल्य ७९ रुपैयाँ प्रतिकेजी छ । भारतीय बजार वनगाउँमा ७७ रुपैयाँ प्रतिकेजीका दरले चिनी किन्नकै लागि २ घण्टा लाइन बस्ने गर्छन्´, उनले भने । नेपालीहरूको करोडौं रुपैँया  भारतीय बजारमा जाने गरेको उनको भनाइ छ ।

नेपालमा पाइने सामान गुणस्तरीय हुने गरेको भएपनि तर नबुझेरै धेरै नेपालीहरू सस्तो पाउने भरमा भारतीय बजार सम्म पुग्ने गरेका छन्,’ अध्यक्ष पन्तले भने । केही सामान नेपाली बजारमा महँगो हुने गरेको भए पनि गुणस्तरीय हुने गरेको उनले बताए । 

चाडपर्व तथा कुनै भोज भतेरमा नेपालीहरू सस्तो पाउँने आशामा भारतीय बजार पुग्ने गरेका छन् । केही साना व्यापारीहरूले पनि फलफूल तथा तरकारीहरू भारतबाट ल्याउने गरेका छन् । यसरी भारतबाट आउने सामानमा गुणस्तरीय भने नहुने कैलाली उद्योग वाणिज्य संघ, कैलालीका अध्यक्ष पुष्पराज कुँवरले बताए । उनले खाद्यान्न तथा अन्य सामानहरूमा गुणस्तरीयता भने नहुने बताए ।

धनगढी बजार छोडेर भारतीय बजार जाँदा नेपाली बजारमा पनि असर पर्छ’, उनले भने । यसका लागि भन्सार कार्यालय कैलालीले पनि कडाइ गर्नुपर्छ । भारतीय बजारमा नेपाली उपभोक्ता जाने गरेमा यसले नेपालको अर्थतन्त्रलाई पनि असर पर्ने बताए । भन्सारबाट यसरी भित्रिने सामानमा प्रशासनको ध्यान जानुपर्ने उनको भनाइ छ । यस्तै उनले यसमा भन्सार कार्यालय कैलालीले के कस्ता बस्तु कसरी आइरहेका छन् भन्ने कुरामा ध्यान दिनुपर्ने बताए । 

भारतीय बजारमा कैलाली र कञ्चनपुरबाट मात्रै नभएर सस्तो सामान पाउने भन्दै सुदूरपश्चिमका विभिन्न जिल्लाबाट नेपालीहरू भारतीय बजार सम्म जाने गरेका छन् ।

झलक दवाडी/धनगढी

 

Share Your Thoughts

Recent News

Main News

TRENDING

Close in 7


Bizpati.com © 2020. All Rights Reserved