२ हप्ताको अन्तरालमा फलामे डण्डीको भाउ २ पटक बढेको छ । पौष १० गतेसम्म प्रतिकिलो ९२ देखि ९३ रूपैयाँमा बिक्री भइरहेको फलामे डण्डीको भाउ अहिले १ सय रूपैयाँसम्म पुगेको छ ।
निर्माण सामग्री व्यापार संघका अनुसार पौष दोस्रो हप्ता फलामे डण्डीको भाउ बढेर प्रतिकिलो ९४ रुपैयाँदेखि ९६ रुपैयाँ पुगेको थियो । अहिले फेरि बढेर ९७ रुपैयाँदेखि १ सय रूपैयाँसम्म पुगेको छ ।
अधिकांश उद्योगको उत्पादन बन्द भएकाले भाउ बढेको व्यवसायीहरुले बताएका छन् । अधिकांश ठूला उद्योगमा विद्युत लाइन काटिएकाले उत्पादन नहुँदा डण्डीको मूल्य बढेको हो ।
विद्युतको बक्यौता बाँकी रहेको भन्दै विद्युत प्राधिकरणले उद्योगको लाइन काटिदिएको छ । बिजुली नहुँदा उद्योग बन्द अवस्थामा छन् ।
जसका कारण बजारमा मूल्य बढेको मात्रै नभई फलामे डण्डीको अभाव नै सुरु हुन थालेको छ । माग नबढे पनि सबै खालका डण्डी पाउन मुस्किल रहेको व्यवसायीहरुले बताउन थालेका छन् ।