हिमालयन रि–इन्स्योरेन्स लिमिटेडको आईपीओमा तेस्रो दिन १ करोड ८० लाख ६३ हजार ७९० कित्ताका लागि आवेदन परेको छ । कम्पनीले सर्वसाधारणलाई आईपीओ निष्काशन खुला गरेको तेस्रो दिन नै १० लाख ७१८ जनाले आवेदन दिएका हुन् ।
उक्त आवेदनबाट ३ अर्ब ७२ करोड ११ लाख ४० हजार ७४० रुपैयाँ संकलन भएको छ । कम्पनीले सर्वसाधारणलाई प्रिमियम मूल्यमा २ करोड ४९ लाख कित्ता शेयर निष्काशन गरेको हो ।
कम्पनीले अंकित मूल्य १०० रुपैयाँमा प्रिमियम वापत १०६ रुपैयाँ थपेर प्रति कित्ता २०६ रुपैयाँमा शेयर निष्काशन गरेको हो । यस निष्काशनमा न्युनतम १० कित्ता र अधिकतम ३ लाख कित्ताको लागि आवेदन दिन सकिने छ । इच्छुक लगानीकर्ताले पुस १ गतेसम्म आवेदन दिन सक्ने छन् । शेयर निष्काशनको लागि एनएमबि क्यापिटल बिक्री प्रबन्धक रहेको छ ।
कम्पनीले यस अघि नै श्रम स्वीकृति लिई वैदेशिक रोजगारमा रहेका नेपालीलाई निष्काशन गरिसकेको छ । सो आईपीओमा ३४ हजार २ सय ११ जनाबाट ४५ लाख ८४ हजार ८ सय १० कित्ताको लागि आवेदन परेको थियो । श्रम स्वीकृति लिई वैदेशिक रोजगारमा रहेका नेपालीलाई निष्काशन गरेको आईपीओमा परेको यो आवेदन हालसम्म कै उच्च हो ।
नेपाल धितोपत्र बोर्डले कार्तिक १ गते कम्पनीलाई आईपीओ निष्काशन गर्न अनुमति दिएको हो । कम्पनीले भदौ २६ गते बोर्डमा आवेदन दिएकोमा ३५ दिन मै आईपीओ निष्काशनको अनुमति पाएको हो ।
हिमालयन रि–इन्स्योरेन्स निजि क्षेत्रको लगानीमा स्थापित पुनर्बीमा कम्पनी हो।
