नेपाल राष्ट्र बैंकले लघुवित्त वित्तीय संस्थाहरुको गैर–स्थलगत सुपरिवेक्षण प्रतिवेदन सार्वजनिक गरेको छ । राष्ट्र बैंकले आर्थिक वर्ष २०७९/८० को दोस्रो त्रयमाससम्मको अपरिष्कृत वित्तीय विवरणको आधारमा गैर–स्थलगत सुपरिवेक्षण गरी समग्र वित्तीय स्थितिको विश्लेषण तथा निर्देशन पालनाको अवस्था सहितको प्रतिवेदन सार्वजनिक गरेको हो ।
प्रतिवेदन अनुसार २०७९ पुस मसान्तसम्ममा खुद्रा कर्जा प्रदायक लघुवित्त वित्तीय संस्थाहरुको निष्क्रिय कर्जा रकममा उल्लेखनिय वृद्वि भएको छ । खुद्रा कर्जा प्रदायक लघुवित्त वित्तीय संस्थाहरुले प्रवाह गरेको कुल कर्जा तथा सापट रकम २०७९ असारको तुलनामा ०.०८ प्रतिशतले घटेर २०७९ पुस मसान्तमा रू.३ खर्ब ९१ अर्ब ४४ करोड पुगेको देखिन्छ । यसैगरी २०७९ पुस मसान्तमा निष्क्रिय कर्जा रु.१८ अर्ब ३४ करोड अर्थात ४.६८ प्रतिशत रहेको छ । २०७९ असार मसान्तमा निष्क्रिय कर्जाको अनुपात २.५६ प्रतिशत रहेको थियो । समीक्षा अवधिमा निष्क्रिय कर्जाको वृद्धिदर ८२.६२ प्रतिशत छ जुन गत आर्थिक वर्षको सोही अवधिमा १७.०३ प्रतिशतले बढेको थियो।
प्रतिवेदन अनुसार समीक्षा अवधिमा अघिल्लो आर्थिक बर्षको दोस्रोत्रयमासको तुलनामा खुद्रा कर्जा प्रदायक लघुवित्त वित्तीय संस्थाहरुको खुद मुनाफामा उल्लेखनिय ह्रास आएको छ । उक्त लघुवित्त वित्तीय संस्थाहरुको २०७८ पुस मसान्तमा खुद मुनाफा रु. ५ अर्ब ८९ करोड रहेकोमा ५८.९० प्रतिशतले ह्रास भई २०७९ पुस मसान्तमा खुद मुनाफा २ अर्ब ४२ करोड पुगेको छ । समीक्षा अवधिमा उक्त लघुवित्त वित्तीय संस्थाहरुको ब्याज आम्दानी रु. २७ अर्ब ३३ करोड र ब्याज खर्च रु. १६ अर्ब ५ करोड रहेको छ । यस अवधिमा सञ्चालित ६० खुद्रा कर्जा प्रदायक लघुवित्त वित्तीय संस्थाहरु मध्ये ८ वटा लघुवित्त वित्तीय संस्थाहरु खुद नोक्सानीमा रहेको देखिन्छ ।