एफवान सफ्ट इन्टरनेसनलले ७७ करोड ऋण लिने भएको छ । कम्पनीले ४५ करोड टर्म लोन, १२ करोड वर्किंङ क्यापिटल लोन र २० करोडको बैंक ग्यारेन्टी गरि कुल ७७ करोड ऋण लिन लागेको हो । कम्पनीले आफुले लिने ऋणको इक्रा नेपालबाट रेटिङ गराएको छ ।
सन् २०२२ मा एफवान सफ्ट इन्टरनेसनलको संचालन आम्दानी १५ अर्ब ६४ करोड थियो। सन् २०२३ को पहिलो हाफमा कम्पनीको संचालन आम्दानी ६ अर्ब ११ करोड रहेको छ । कम्पनीले सन् २०२२ को मुनाफाबाट २०० प्रतिशत लाभांश बितरण गरेको थियो। कम्पनीले खुद नाफाको १३५ प्रतिशत रकम मुनाफाको रुपमा बाडेको हो ।
रेटिंङको क्रममा ईक्रा नेपालले कम्पनीको आम्दानीको स्रोत एउटामात्र भएकोले जोखिम रहेको निष्कर्ष निकालेको छ । हाल कम्पनीको ९८ प्रतिशत आम्दानी थोरै मार्जिन हुने प्रडक्ट र सर्भिस बिक्रीबाट हुने गरेको छ । यसमा रिचार्च र बल्क एसएमएस सर्भिस पनि समावेश छ । यदि टेलिकम सेवा प्रदायकहरुले मार्जिन घटाएमा कम्पनीको आम्दानीमा ठुलो प्रभाव पर्ने उल्लेख गरिएको छ ।
एफवान सफ्ट सन् २००४ मा स्थापना भएको कम्पनी हो। नेपालका बैंक तथा वित्तीय संस्थाले प्रदान गर्ने मोबाइल बैंकिंग सेवा तथा इन्टरनेट बैंकिंग सेवाको सिस्टम यस कम्पनीले तयार पारेको हो । कम्पनीको धेरै वटा सहायक कम्पनी पनि रहेका छन् । हाल कम्पनीको अध्यक्ष विश्वास ढकाल हुन् । कम्पनीमा उनको ३५ प्रतिसहत लगानी रहेको छ ।