पूर्व अर्थमन्त्री डा. युवराज खतिवडाले शेयरबजारको विषयमा राष्ट्र बैंकको भूमिका माथि प्रश्न उठाएका छन्। नेपाल उद्योग व्यवसायी महासंघले आयाेजना गरेकाे अन्तरक्रिया कार्यक्रममा उनले राष्ट्र बैंकले धितोपत्र बजारमा अनावश्यक हस्तक्षेप गरिरहेको र यो काम राम्रो नभएको टिप्पणी गरेका हुन् ।
राष्ट्र बैंकका पुर्व गभर्नर समेत रहेका डा. खतिवडाले शेयर बजार ओभर करेक्सन हुँदा शेयरधितो कर्जामा १५० प्रतिशतको जोखिमभार राखिरहनु ठिक नभएको बताए । त्यस्तै उनले धितोपत्र बोर्डको भूमिका माथि पनि प्रश्न गर्दै बजारलाई स्थायित्व दिने जिम्मेवारी पाएको धितोपत्र बोर्डले आईपीओ बाढी ल्याउन नहुने बताए । उनले भने 'बजारलाई स्टेबल राख्न धितोपत्र बोर्डको हो, आईपीओ आईपीओ भनेर बोर्डले किन बाढी ल्याइरहेको छ ?'
उनले नेप्सेको हालत पनि ठिक नभएको बताए । टि प्लस २ भनिए पनि सो समयमा शेयर कारोबारको राफसाफ नहुने गरेको र शेयर कारोबारको सिस्टम पनि गतिलो नभएको टिप्पणी गरेका छन्।
डा. खतिवडाले कुनै पनि निकाय आफ्नो जिम्मेवारीबाट भाग्नु नहुने र आफ्ना जिम्मेवारी पन्छाएर हल्लाखल्ला गरेर केही नहुने बताए । उनले अर्थ मन्त्रालयले पनि राष्ट्र बैंकमाथि अन्वाश्यक हस्तक्षेप गरिरहेको भन्दै त्यसलाई रोक्नु पर्ने बताए ।