नेपाल स्टक एक्सचेन्ज नेप्सेले नेप्सेको पुनर्संरचनाको लागि फेरी अर्थ मन्त्रालयमा प्रस्ताव पठाएको छ । नेप्सेको मङ्सिर २८ गते बसेको संचालक समितिको बैठकले निर्णय गरेर नेप्सेको पुनर्संरचनाको लागि मन्त्रालयमा प्रस्ताव गरेको हो ।
नयाँ स्टक एक्सचेन्ज आउने भएपछि अहिलेकै अवस्थामा नेप्से धरासायी हुने भन्दै नेप्सेको पुनर्संरचनाको माग उठ्दै आएको छ । सोहि अनुसार नेप्सेमा अध्यक्षको रुपमा शोभाकान्त पौडेलको नियुक्ति भएपछि पुनर्संरचनाको लागि मन्त्रालयमा प्रस्ताव गरिएको हो ।
जस अनुसार नेप्सेले ३० प्रतिशत शेयर सर्वसाधारणको लागि आईपीओ निष्काशन गर्ने प्रस्ताव गरिएको छ । सर्वसाधारण समुह नै नेप्सेको सबैभन्दा ठूलो शेयरधनी समुहको रुपमा रहने छ ।
यस अघि अर्थ मन्त्रालयले काठमाडौँ विश्वविद्यालयलाई कन्सल्टेन्ट नियुक्त गरेर नेप्सेको पुनर्संरचनाको लागि अध्ययन प्रतिवेदन पेश गर्ने जिम्मा दिएको थियो । त्यस प्रतिवेदनमा पनि ३० प्रतिशत शेयर सर्वसाधारणलाई प्रिमियम मूल्यमा आईपीओ निष्काशन गर्ने सकिने प्रस्ताव गरेको थियो । अहिले नेप्सेले गरेको प्रस्तावमा पनि सर्वसाधारणलाई शेयर निष्काशन गरेर नेप्से आफै सुचिकृत कम्पनी बन्ने प्रस्ताव गरिएको छ ।
यस्तो नेप्सेमा नेपाल राष्ट्र बैंकको शेयर ३.१७ प्रतिशतमा सिमित गर्ने र राष्ट्रिय वाणिज्य बैंकको शेयर ३.७४ प्रतिशतमा सिमित गर्ने प्रस्ताव गरिएको छ । नेप्सेको ३६ प्रतिशत शेयर पुनर्बीमा कम्पनी, जीवन तथा निर्जीवन कम्पनी, वाणिज्य बैंक तथा राष्ट्रिय स्तरको विकास बैंक, सरकारी स्वामित्वका संस्थानलाई दिन प्रस्ताव गरिएको छ । शेयर संरचना संशोधन गरी उपयुक्त शेयर विदेशी स्टक एक्सचेन्जलाई दिन सकिने गरि नेप्सेले प्रस्ताव पेश गरेको छ ।
हाल नेप्सेको चुक्ता पुंजी १ अर्ब रहेको छ । नेपाल धितोपत्र बोर्डले नयाँ स्टक एक्सचेन्जको लागि ३ अर्ब पुंजी तोकेको छ । नेप्सेलाई भने ३ अर्ब पुंजी पुर्याउन अनिवार्य छैन । तर पनि नेप्सेले पुनर्संरचना प्रस्ताव पठाउँदा ३ अर्ब नै पुंजी कायम हुने गरि प्रस्ताव पठाएको छ ।
यस्तो छ नेप्सेले प्रस्ताव गरेको शेयर संरचना: (चुक्ता पुंजी ३ अर्ब)
सर्वसाधारण : ३० प्रतिशत
नेपाल सरकार: १९.५५ प्रतिशत
नेपाल राष्ट्र बैंक: ३.१७ प्रतिशत
राष्ट्रिय वाणिज्य बैंक: ३.७४ प्रतिशत
कर्मचारी संचय कोष : ३.३३ प्रतिशत
लक्ष्मी बैंक: १.६७ प्रतिशत
प्रभु बैंक : १.६७ प्रतिशत
अन्य संस्थापकहरु: ०.२ प्रतिशत
पुनर्बीमा कम्पनी, जीवन तथा निर्जीवन कम्पनी: १३.३३ प्रतिशत
वाणिज्य बैंक तथा राष्ट्रिय स्तरको विकास बैंक :१३.३३ प्रतिशत
सरकारी स्वामित्वका संस्थान :१०.०० प्रतिशत
यस्तो छ हालको शेयर संरचना: (चुक्ता पुंजी १ अर्ब)
नेपाल सरकार : ५८.६६ प्रतिशत
राष्ट्रिय वाणिज्य बैंक : ११.२४ प्रतिशत
नेपाल राष्ट्र बैंक : ९.५ प्रतिशत
कर्मचारी संचय कोष : १० प्रतिशत
लक्ष्मी बैंक : ५ प्रतिशत
प्रभु बैंक : ५ प्रतिशत
अन्य : ०.६० प्रतिशत