त्रिभुवन अन्तराष्ट्रिय विमानस्थलमा यति एयरको जहाज चिप्लिएर विमानस्थलमा उडान अवतरण प्रभावित भएको छ । यति एयरको चिप्लिएको जहाज हटाउन समय लाग्ने भएकोले विमानस्थल बन्द गरिएको छ ।
विमानस्थल बन्द भएकोले काठमाडौँ आउँन लागेका जहाजलाई डाईभर्ट गरिएको छ । विमानस्थलका अनुसार एयर चाइनाको विमानलाई ल्हासा, दुबईबाट आएको नेपाल एयरलायन्सलाई दिल्ली, दोहाबाट आएको हिमालय एयरलायन्सलाई वाराणसी, दोहाबाट नै आएको कतार एयरवेजको जहाज कोलकाता डाईभर्ट गरिएको छ । त्यस्तै थाईल्याण्डबाट आएको थाई एयरवेज र ढाकाबाट आएको विमान बंगलादेशको जहाज काठमाडौँको आकाशमा नै घुमिरहेका छन् ।
यतिको जहाज धावनमार्गबाट जहाज चिप्लिएर ट्याक्सी वेमा पुगेको हो। नेपालगञ्जबाट काठमाडौँ आएको यतिको एटीआर जहाज अवतरणको क्रममा चिप्लिएको हो । जहाजभित्र चालक दलका सदस्यसहित ७० जना यात्रु थिए । विमानस्थल प्रवक्ता प्रतापबाबु तिवारीले जहाज चिप्लिदा २ यात्रु घाइते भएको जानकारी दिए ।
