नेपाल वायुसेवा सञ्चालक संघले विदेशबाट आउने यात्रुका लागि अनिवार्य कोरोना परीक्षणको व्यवस्था हटाउन माग गरेको छ । संघले अन्तराष्ट्रिय उडानमा पीसीआर परीक्षण र सीसीएमसीको फाराम अनिवार्य रहेको भन्दै यो व्यवस्था हटाउन माग गरेको हो ।
कोरोना संक्रमितको संख्या घटेको र भारतसहित युरोपेली मुलुकले समेत अनिवार्य परीक्षणको व्यवस्था हटाएकाले नेपालमा पनि हटाउन संघले माग गरेको हो ।
यो नियम बटाएमा विदेशीको आगमन बढ्ने र पर्यटन व्यवसायीले राहत पाउने संघको भनाई छ । कोभिड संक्रमण दर घटिरहेको र धेरैजसो मुलुकले प्रतिबन्धलाई खुकुलो पारेको पनि संघ स्मरण गराएको छ ।
विदेशी पर्यटककै भरमा रहेका कतिपय व्यवसाय विदेशी पर्यटक नआउँदा सदाका लागि बन्द हुने अवस्थामा पुगेको भन्दै संघले यसले नेपालमा रहेको दक्ष जनशक्ति पलायन हुने खतरा बढेको तर्फ पनि सचेत गराएको छ ।
काठमाडौँस्थित त्रिभुवन अन्तराष्ट्रिय विमानस्थलबाट ३ नेपालीसहित २९ वटा वायुसेवा प्रदायकले अन्तराष्ट्रिय उडान गर्दै आएका छन् ।