दशैँ तथा तिहार नजिकिएपछि आन्तरिक हवाई उडानको टिकट करिब करिब शत् प्रतिशत बुकिङ भएको छ । एयरलाइन्स कम्पनीहरुका अनुसार ९५ प्रतिशत भन्दा माथि सिटहरु बुक भइसकेका छन् । अब टिकट बुकिङ गर्न सक्ने क्षमतामा एयरलाइन्स कम्पनीहरु छैनन् ।
त्यसो त, हवाई भाडा पनि महँगिएको छ । तत्काल टिकट चाहिँदा र धेरै दिन पछिको टिकट अहिल्यै बुकिङ गर्दा भाडादर फरक फरक हुने एयरलाइन्स कम्पनीहरुले बताएका छन् । अहिले चाप धेरै पर्दा टिकट माग बढ्दै गएको र उपलब्ध सिट संख्या कम हुँदै गएकाले माग र आपुर्तिका आधारमा भाडादर पनि सोही अनुसार तय हुने टिकेटिङको व्यवसाय गर्दै आएका कम्पनीहरु बताउँछन् ।
अहिले सबैभन्दा धेरै बुकिङ लिएका कम्पनीहरुमा बुद्ध एयर, यती एयरलाइन्स, श्री एयर र सौर्य सौर्य एयरलाइन्स छन् । अन्य एयरलाइन्सले पनि जहाज संख्या र उडान संख्याका आधारमा टिकट बुकिङ लिएका छन् ।
कहाँ पुग्न कति छ भाडा ?
आन्तरिक उडानतर्फ सबैभन्दा महँगो गन्तव्य बनेको छ धनगढी । काठमाडौँ–धनगढीको हवाई भाडा १७ हजारसम्म छ । यो गन्तव्यमा अलि पछाडीको टिकट लिँदा न्यूनतम् ११ हजार रुपैयाँ पर्छ । नेपालको आन्तरिक उडानमा सबैभन्दा महँगो गन्तव्य नै काठमाडौँ–धनगढी हो ।
दोस्रो महँगो गन्तव्य सुर्खेत बनेको छ । काठमाडौँ–वीरेन्द्रनगर एकतर्फी हवाई भाडा ११ हजारदेखि १५ हजार रुपैयाँसम्म छ ।
काठमाडौँ–नेपालगन्जको भाडादर ६ हजारदेखि १४ हजार रुपैयाँसम्म पुगेको छ । काठमाडौँदेखि झापाको भद्रपूर सम्मको हवाई भाडा १२ हजार छ । काठमाडौँ–विराटनगर १० हजारसम्म पुगेको छ ।
त्यस्तै, काठमाडौँ–भैरहवा र काठमाडौँ–राजविराजको भाडा समान ८ हजार ५ सय रुपैयाँसम्म पुगेको छ । काठमाडौँ–जनकपूरको ६ हजार, काठमाडौँ–पोखराको ६ हजार काठमाडौँ–भरतपूरको ५ हजार रुपैयाँ हवाई भाडा छ ।
काठमाडौँ–सिमराको भाडा ४५ सय छ । यो सबैभन्दा छोटो गन्तव्य हो ।
