नेपाल राष्ट्र बैंकले तिहारलाई लक्षित गर्दै आजदेखि बिक्रीमा ल्याएको सुनका असर्फी र चाँदीका सिक्काको बिक्री मूल्य निर्धारण गरेको छ ।
केन्द्रीय बैंकको मुद्रा व्यवस्थापन विभागअन्तर्गत टक्सार महाशाखाका अनुसार १० ग्राम सुनको असर्फीलाई १ लाख २ हजार ३ सय ६५ रुपैयाँ, ५ ग्राम सुनको असर्फीको ५१ हजार १ सय ८३ रुपैयाँ, २.५ ग्राम सुनको असर्फीको २५ हजार ५ सय ९२ रुपैयाँ तोकिएको छ ।
त्यसैगरी, १० ग्राम चाँदीको लक्ष्मी/गणेश/गजलक्ष्मी/गाई मेडालियनलाई १ हजार ६ सय रुपैयाँ र २५ ग्राम चाँदीको गाई मेडालियनको ४ हजार रुपैयाँ रहेको छ ।
सर्वसाधारणले आज आइतबारदेखि शुक्रबारसम्म बिहान ११ बजेदेखि दिउँसो ३ बजेसम्म सिक्का खरिद गर्न सक्नेछन् । उक्त असर्फी र सिक्का खरिद गर्दा नगद वा क्यूआरमार्फत भुक्तानी गर्न सकिने बैंकले जनाएको छ ।