.gif)
नवलपरासी क्षेत्र नम्बर १ मा सत्तारूढ गठबन्धनका तर्फबाट उठेका
नेपाली कांग्रेसका उम्मेदवार तथा विवादित डलर अर्बपति विनोद चौधरीले निर्वाचन आचारसंहिता
विपरित दैनिक भोजभतेर संचालन गरिरहेका छन् ।
उक्त भोजभतेरमा दैनिक डेढ सय भन्दा बढीलाई चार पटकसम्म मासुभात
खुवाउने व्यवस्था गरिएको छ । बर्दघाट नगरपालिकाको जिमिरेभारमा अवस्थित त्रिनेत्र
अध्यात्म धाममा संचालित उक्त भोज भतेरविरुद्ध जिल्ला निर्वाचन कार्यालयमा उजुरी
परेको भएपनि कुनै कारवाही भने भएको छैन ।
विगत एक साता भन्दा बढी समयदेखि
चलिरहेको भोजभतेरमा जो कोही पनि आएर खान सक्ने व्यवस्था छ । सञ्चारमाध्यमहरूले
भोजभतेर बारे समाचार प्रकाशन र प्रसारण गरे पनि चौधरीले अटेरी गरिरहेका छन् ।
जिल्ला निर्वाचन कार्यालयले भने चौधरीमाथि परेको उजुरीको अनुसन्धान भइरहेको जनाएको
छ ।
त्यति मात्र नभएर चौधरीले आफ्नो
क्षेत्रमा निशुल्क इन्टरनेटसमेत वितरण गर्न लगाइरहेका छन् । निर्वाचन जसरी पनि
जित्ने प्रयासमा लागेका चौधरीले भोट तान्न भतेर, पैसा, निशुल्क इन्टरनेट, रोजगारी दिन्छु भन्दै नयाँ कम्पनी दर्ता, पैसा, जस्ता
सबै हत्कण्डा प्रयोग गरिरहेका छन् ।
चौधरीले आफ्नो बारेमा समाचार लेख्ने
सञ्चारमाध्यमलाई अदालतमा मुद्दा हाल्नेदेखि मान्छे पठाएर धम्क्याउनेसमेत गरेको
तथ्य बिजपाटीले यसअघि लेखेको थियो ।
स्थानीय नागरिक समाजका अगुवा बृजराज कुशवाह चौधरीले निर्वाचन प्रचार
प्रसारमा बालबालिकासमेत प्रयोग गरिरहेको बताए ।
'चौधरीको निर्वाचन प्रचार-प्रसार अभियानमा स्कूले बालबालिका पनि
टन्नै देखिएका छन्, यसबारे
निर्वाचन कार्यालयमा उजुरी परेको छ तर अहिलेसम्म कुनै कारवाही भएको सुनिएको छैन,' कुशवाहले भने ।
निर्वाचन आचारसंहिता, २०७९ ले मतदातालाई प्रलोभनमा पार्ने
गरी भोज खुवाउन नपाइने तथा चुनाव प्रचारप्रसारमा बालबालिकाको प्रयोग गर्न निषेध
गरेको छ । यस्तो गरेको पाइएमा आयोगले निर्वाचन आयोग ऐन, २०७३
दफा २३ बमोजिम एक लाख रुपैयाँसम्म जरिवाना र उम्मेदवारी रद्दसम्म गरिदिन सक्छ ।
.gif)
