विद्युत नियमन आयोगका अध्यक्ष डिल्ली बहादुर सिंहले नेपालले विजुली युरोप र अफ्रीकासम्म पुर्याउन सकिने बताएका छन् । उर्जा उत्पादकहरुको संस्था इप्पानले आयोजना गरेको पावर समिटको समापन समारोहलाई सम्बोधन गर्दै उनले नेपालको विजुली युरोप र अफ्रीकासम्म पुर्याएर देशलाई सम्बृद्ध बनाउन सकिने बताएका हुन् ।
भारतीय प्रधानमन्त्रीले 'वान वल्ड, वान ग्रिड' को अवधारणा अघि सारेको र सोहि अवधारणा अनुसार नै नेपालको विजुली युरोपसम्म पुर्याउन सकिने अध्यक्ष सिंहले उल्लेख गरेका हुन् । उनका अनुसार केहि समय अगाडी इन्डिया स्मार्ट ग्रिड फोरमको आयोजनामा यस बारे छलफल समेत भैसकेको छ । दक्षिण एसियाको ग्रिड, गल्फ ग्रिड, र एसियन ग्रिड कनेक्ट गर्न सकिने सो छलफलको निष्कर्ष रहेको अध्यक्ष सिंहले सुनाए ।
अध्यक्ष सिंहका यस बृहतर योजनाको सुरुवात भने बिबिआइएन ग्रिड अर्थात् बंगलादेश, भुटान, इन्डिया र नेपालको ग्रिड कनेक्ट गराएर सुरु हुने छ । त्यसपछि यस ग्रिडलाई म्यान्मार हुँदै थाईल्याण्ड कनेक्ट गरिने छ । त्यसपछि एसियन ग्रिडलाई सिंगापुर कनेक्ट गर्न सकिने उनले उल्लेख गरे । त्यस्तै एसियन ग्रिडलाई अफगानिस्थान, पाकिस्तान र ओमान हुँदै युएईसम्म पुग्ने उनले बताए । युएई पुगेको ग्रिडलाई युएईबाट अफ्रीका जोड्न सकिने र युएईबाट नै ग्रिडलाई अफ्रीका जोड्न सकिने उनको भनाई थियो । त्यसपछि युएईबाट टर्की हुँदै सो ग्रिडलाई युरोपसम्म जोड्न सकिने अध्यक्ष सिंहले बताए ।
यसो हुँदा नेपालको बिजुली सिधै अफ्रीका र युरोपसम्म पुग्ने उनको भनाई थियो । यसो हुँदा बिजुली बेचेर नेपाल समृद्ध हुन सक्ने र नेपालको ८० हजार मेगावाटको भनिएको क्षमता २ लाख मेगावाटसम्म उत्पादन गर्न सकिने अध्यक्ष सिंहले दाबी गरे ।
यसो हुनलाई केहि दशक लाग्ने भएपनि गन्तब्य भने त्यहि नै रहेको उनले उल्लेख गरे । ग्रिड बनेर नेपालको बिजुली अफ्रीका र युरोप पुग्ने १०/१५/२० वर्ष वा त्यो भन्दा पनि बढी लाग्न सक्ने भए पनि त्यसलाई नै गन्तब्य मानेर काम गर्नु पर्ने उनले बताए ।
त्यसो हुँदा महाकवि लक्ष्मी प्रसाद देवकोटाले भने जस्तै नेपालमा सुनौलो बिहानी आउने अध्यक्ष सिंहको भनाई थियो। तर त्यसको लागि सबैले दिनरात मेहनत गर्नु पर्ने उनले बताएका छन् ।
सन् २०२७ मा नेपाल वर्ष भरि नै विद्युतमा आत्मनिर्भर हुने भएकोले विजुली निर्यात गर्नु पर्ने अवस्था रहेको उनले उल्लेख गरे ।