.gif)
एनआईसी एशिया लघुवित्तले निष्काशन गरेको आईपिओको विवरण मेरो शेयरमा नदेखाउंदा लगानीकर्ता अन्योलमा परेका छन् । आईपिओ खुलेको दिनको १० बजेदेखि नै शेयरमा आवेदन दिन मिल्नु पर्ने भएपनि एनआईसी एसिया लघुवित्तको हकमा यो समाचार तयार पार्दासम्म शेयर भर्न मिलेको छैन ।
सिडीएस स्रोतका अनुसार बिक्रि प्रबन्धक सानिमा क्यापिटलले आईपिओको लागि सेटअप गर्दा केहि प्राविधिक समस्या भएकोले यस्तो भएको हो । सानिमाले नयाँ सीआश्वाको सिस्टम आएपछि पहिलो पटक बिक्रि प्रबन्धकको कार्य गरेको र सेटअप गर्दा केहि प्राविधिक समस्या देखिएको स्रोतले जनाएको छ । केहि समय मै यो समस्या समाधान हुने र लगानीकर्ताले शेयरमा आवेदन दिन सकिने सिडीएसले जनाएको छ ।
अपडेट (१०:४० बजे) : समस्या समाधान भएको छ ।
कम्पनीले आजबाट ४७ करोड ५५ लाख रुपैयाँ बराबरको ४७ लाख ५५ हजार कित्ता आईपीओ निष्काशन गरेको हो । जस मध्ये ०.५ प्रतिशत अर्थात् ७४ हजार कित्ता कर्मचारीहरुको लागि र ५ प्रतिशत अर्थात् २ लाख ३७ हजार ८ सय कित्ता सामुहिक लगानी कोषको लागि सुरक्षित गरिएको छ । बाँकि ४४ लाख ४३ हजार २ सय कित्ताको लागि सर्वसाधारणले आवेदन दिन सक्ने छन् । कम्पनीको आईपिओमा न्युनतम १० कित्ता र अधिकतम २ लाख कित्ताको लागि आवेदन दिन सकिने छ । लगानीकर्ताले असार १४ गतेसम्म आईपिओमा आवेदन दिन सक्ने छन् ।
यस अघि निष्काशन भएका आईपिओमा आवेदन दिनेको संख्या हेर्दा यस आईपिओमा पनि उच्च माग हुने देखिन्छ । तर आईपिओको बाँडफांड गर्ने क्रममा पहिले सबैलाई १० कित्ता वितरण गरिने छ भने बाँकि रहेको शेयर पुगेसम्म थप १० कित्ता र नपुगेमा गोलाप्रथाबाट निश्चित लगानीकर्तालाई थप १० कित्ता वितरण हुने छ । यस हिसाबमा कम्पनीको आईपिओमा न्युनतम २० कित्ता आवेदन दिनु उचित देखिन्छ । यद्यपि लकडाउनको कारण धेरै आवेदन नपर्ने आंकलन पनि केहिले गरेका छन् । त्यसो भएमा आवेदन दिने सबैले २० कित्ता शेयर पाउने सम्भावना पनि रहन्छ ।
यो बजारमा आउँन लागेको लघुवित्त क्षेत्रको हालसम्मकै ठूलो आईपीओ हो। कम्पनीले शेयर निष्काशनको लागि सानिमा क्यापिटललाई बिक्रि प्रबन्धक नियुक्त गरेको छ । लघुवित्तले चालु आर्थिक वर्ष २०७६।७७ को तेस्रो त्रैमाससम्म १९ करोड ४८ लाख रुपैयाँ सञ्चालन मुनाफा आर्जन गरेको छ ।
यो पनि :
एनआईसी एसिया लघुवित्तले कहाँ खर्च गर्छ आईपिओबाट उठेको ४७ करोड रकम ?
