धितोपत्र बजारमा शेयर कारोबार मापक नेप्से परिसूचक आज दोहोरो अंकले घटेको छ । साताको पहिलो दिन आइतबार आज नेप्से सुचक २६.३६ अंकले घटेर २०२२.९२ को बिन्दुमा सीमित भएको छ ।
नेपाल स्टक एक्सचेञ्जका अनुसार ठूला कम्पनीको शेयर कारोबार मापन गर्ने सेन्सेटिभ परिसूचक ६.१६ अंकले घटेर ३७३ को बिन्दुमा आइपुगेको छ ।
आज कुल १ करोड ५२ लाख ६८ हजार ३९९ कित्ता शेयर खरिदबिक्री हुँदा ५ अर्ब २४ करोड १४ लाख ८ हजार ३७९ रुपैयाँ ८५ पैसाको कारोबार भएको छ । कारोबारका आधारमा सोनापुर मिनरल्स शीर्षस्थानमा छ । कम्पनीको २८ करोड ५६ हजार रुपैयाँ बराबरको शेयर कारोबार भयो ।
त्यस्तै हाथवे इन्भेष्टमेन्टका १९ करोड ९४ लाख रुपैयाँ, माउन्टेन इनर्जी नेपाल लिमिटेडको १५ करोड ९० लाख, एनआरएन इनफास्ट्रक्चर एण्ड डेभलपमेन्ट लिमिटेडको १५ करोड ६८ लाख र सिनर्जी पावर डेभलपमेन्टको ११ करोड ९२ लाख रुपैयाँ बराबरको कारोबार भई शीर्ष पाँचभित्र पर्न सफल भएका छन् ।
आज १५९ कम्पनीको शेयर मुल्य घटेको छ भने ८१ कम्पनीको शेयर मुल्य बढेको छ । तेह्रथुम पावर कम्पनीको शेयर मूल्यमा १० प्रतिशतले वृद्धि भएको छ । मुक्तिनाथ कृषि कम्पनी ९.९९ प्रतिशत, नेपाल वेयरहायजिङ्ग कम्पनीको ९.८८ प्रतिशत साथै धौलागिरी लघुवित्त वत्तीय संस्था र सिंगटी हाइड्रो शेयर मुल्य ९.९६ प्रतिशतले बढेको छ ।
यता, मानुषी लघुवित्त वित्तीय संस्थाको शेयर मुल्य ६.६९ प्रतिशतले घटेको छ ।