नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले निजी क्षेत्रले दिएका सुझाव सरकारले नमान्दा अर्थतन्त्रमा गम्भीर समस्या आएको बताएका छन् । शुक्रबार काठमाडौँमा आयोजित फ्लोरा एक्स्पो कार्यक्रममा वरिष्ठ उपाध्यक्ष ढकालले निजी क्षेत्रले दिएका सुझावलाई गम्भीर रुपमा लिएर सरकारले कार्यान्वयन गर्न नसक्दा वर्तमान समस्या निम्तिएको बताएका हुन् ।
मुलुकको अर्थतन्त्रमा समस्या आउँछ भनेर समस्या आउन नदिन उपायसहित सरकारलाई ध्यानाकर्षण गराइएको भएपनि निजी क्षेत्रले दिएका सुझावलाई सरकारले प्राथमिकता नदिएको ढकालको आरोपछ ।
सरकारले आयातमा ६ महिना बढी प्रतिबन्ध लगाएपनि गाडीबाहेक सबै सामान अन्य बाटोबाट आउँदा सरकारले राजस्व गुमाएको र व्यवसायीले व्यवसाय गर्न नपाएको उनले बताए । आयातमा प्रतिबन्ध लगाएपनि गाडी र मोटरसाइकलबाहेक अन्य सामानहरु ‘ग्रे’ मार्केटबाट आउँदा सरकारले अर्बौं राजश्व गुमाएको वरिष्ठ उपाध्यक्ष ढकालको भनाई छ ।
उनले राजस्व संकलन घट्दा सरकारले कर्मचारीलाई तलब समेत खुवाउन नसक्ने अवस्था सिर्जना भएको बताए ।
