रावा इनर्जि डेभलपमेन्ट लिमिटेडले श्रम स्वीकृति लिई विदेशमा रहेका नेपाली नागरिकको लागि निष्काशन गरेको आईपिओमा आवेदन दिने आज वैशाख ७ गते अन्तिम दिन रहेको छ । आयोजना प्रभावित स्थानीयलाई भने आवेदन दिने म्याद थप गरि वैशाख २४ गतेसम्म कायम गरिएको छ ।
कम्पनीले चैत्र २३ गतेदेखि पहिलो चरणको आईपिओ बिक्री खुला गरेको छ । कम्पनीले आयोजना प्रभावित स्थानीय र श्रम स्वीकृति लिई विदेशमा रहेका नेपाली नागरिकको लागि आईपिओ निष्काशन गरेको हो ।
कम्पनीले २ लाख ८० हजार कित्ता शेयर आयोजना प्रभावित खोटाङ जिल्लाका केपिलासगढी गाउँपालिकाका स्थानीयलाई निष्काशन गरेको थियो । त्यस्तै ५६ हजार कित्ता शेयर श्रम स्वीकृति लिई विदेशमा रहेका नेपाली नागरिकको लागि निष्काशन गरेको थियो।
आयोजना प्रभावितले आवेदन दिंदा न्युनतम १० कित्ता र अधिकतम १० हजार कित्ताको लागि आवेदन दिन सक्ने छन्। त्यस्तै श्रम स्वीकृति लिई विदेशमा रहेका नेपाली नागरिकले आवेदन दिंदा न्युनतम १० कित्ता आर अधिकतम २८ सय कित्ताको लागि आवेदन दिन सक्ने छन् ।
स्थानीयले अब वैशाख २४ गतेसम्म आवेदन दिन सक्ने छन् । श्रम स्वीकृति लिई विदेशमा रहेका नेपाली नागरिकले भने आज वैशाख ७ गतेसम्म मात्र आवेदन दिन सक्ने छन् ।
स्थानीय र श्रम स्वीकृति लिई वैदेशिक रोजगारीमा रहेकालाई शेयर निष्काशन गरि बाँडफाँड गरेपछि कम्पनीले सर्बसाधारणलाई शेयर निष्काशन गर्ने छ । नेपाल धितोपत्र बोर्डले कम्पनीलाई फागुन २५ गते आईपिओ निष्काशन गर्ने अनुमति प्रदान गरेको हो । कम्पनीले आयोजना प्रभावित स्थानीय र सर्बसाधारणका लागि गरि कुल ८ करोड ४० लाख बराबरको ८ लाख ४० हजार कित्ता शेयर निष्काशन गर्न अनुमति पाएको हो। शेयर निष्काशनको लागि प्रभु क्यापिटल बिक्रि प्रबन्धक रहेको छ ।
कम्पनीले खोटाङ्ग जिल्लाको केपिलासगढी गाउँपालिकामा अवस्थित रावा खोलामा ३ मेगावाट क्षमताको आयोजना निर्माण कार्य सम्पन्न गरि विद्युत उत्पादन गरिरहेको छ । त्यस्तै रावा खोलामा नै २.५ मेगावाटको अर्को आयोजना निर्माण गरिरहेको छ ।
