कुमारी क्यापिटलले निष्काशन गरेको म्युचुअल फण्डमा आवेदन दिने म्य्द थपिएको छ । म्याद थपिएसंगै यस निष्काशनमा फागुन १३ गतेसम्म आवेदन दिन सकिने छ । यद्यपि सो मिति अगावै पर्याप्त आवेदन परेमा सार्वजनिक सूचना जारी गरेर सो अगावै बिक्री बन्द गरिने क्यापिटलले जनाएको छ ।
क्यापिटलले माघ २८ गतेबाट कुमारी सबल योजना नामक सामुहिक लगानी कोष योजनाको इकाईहरु बिक्री खुला गरेको हो। क्यापिटलले कुमारी म्युचुअल फण्ड अन्तर्गत संचालन हुने कुमारी सबल योजना नामक बन्दमुखी म्युचुअल फण्ड योजनाको इकाई निष्काशन गरेको हो ।
यस योजनाको आकार १ अर्ब रहेको छ । क्यापिटल प्रति इकाई १० रुपैयाँको दरले फण्डको १० करोड इकाई निष्काशन गरेको हो । जस मध्ये १ करोड ४० लाख इकाई कोष प्रबर्दक कुमारी बैंकलाई छुट्याईएको छ। बाँकि रहेको ८ करोड ५० लाख इकाईको लागि सर्वसाधारणले आवेदन दिन सक्ने छन् ।
आवेदन दिंदा न्युनतम १०० कित्ता र अधिकतम १ करोड कित्ताको लागि दिन सकिने छ । यस म्युचुअल फण्डको अवधि १० वर्ष रहेको छ।
हाल क्यापिटलले कुमारी इक्विटी फण्ड र कुमारी धनवृद्धि योजना नामक बन्दमुखी योजना र 'कुमारी सुनौलो योजना' नामक खुलामुखी योजना संचालन गरिरहेको छ ।