नेपाल आयल निगमले बुधबार पट्रोलियम पदार्थको मूल्य वृद्धि गरेपछि डिजेल र मट्टीतेल ४५ महिना यता कै महँगो भएको छ । निगमले बुधबार पेट्रोलमा रु १, डिजेल तथा मट्टितेलमा रु ३ वृद्धि गर्ने निर्णय गरेको हो। यस्तै ग्यासमा पनि प्रति सिलिन्डर रु २५ बृद्धि भएको निगमले जनाएको छ ।
नयाँ मूल्यअनुसार पेट्रोल प्रति लिटर १ सय १२, डिजेल र मट्टीतेल प्रतिलिटर ९८ रुपैयाँमा बिक्रिवितरण हुने छ। त्यस्तै खाना पकाउने एलपी ग्यासको नयाँ मूल्य प्रति सिलिन्डर १ हजार ४ सय रुपैयाँ कायम भएको छ।
मूल्य वृद्धि संगै डिजेल र मट्टीतेल ४५ महिना यता कै महँगो भएको छ । यस अघि डिजेल र मट्टीतेलको मूल्य २०७१ साल मङ्सिरमा प्रति लिटर ९७.५० रुपैयाँ रहेको थियो । त्यसपछि पहिलो पटक अहिले डिजेलको मूल्य ९८ रुपैयाँ पुगेको हो ।
बढेको मूल्य बुधबार मध्यरातदेखि नै लागु हुने निगमले स्पष्ट पारेको छ ।