नेपाली राष्ट्रिय टिमका युवा ओपनर कुशल भुर्तेल र दीपेन्द्रसिंह ऐरीले आइसिसी टि२० विश्वकप ग्लोबल छनोट ए मा उत्कृष्ट शतकीय साझेदारीका साथ फिलिपिन्सविरुद्ध नयाँ कीर्तिमान कायम गरेका छन् ।
ओमानमा जारी खेलमा टस हारेर ब्याटिङको निम्तो पाएको नेपालले निर्धारित २० ओभरमा ३ विकेट गुमाउँदै २ सय १८ रन बनायो । ओपनर कुशल भुर्तेलले ६१ बलमा १३ चौका र १ छक्कासहित १ सय ४ रनको अविजित शतकीय इनिङ खेले । दीपेन्द्रसिंह ऐरी ४७ बलमा ६ चौका र ४ छक्का सहित ८३ रनमा आउट भए ।
तेस्रो विकेटका लागि कुशल र दीपेन्द्रले १ सय ७१ रनको शतकीय साझेदारी गरे । जुन नेपाली टि–२० आईमा आजसम्मकै उच्च साझेदारी हो । यसअघि नेपालबाट २०१९ मा सिंगापुरविरुद्ध पारस खड्का र आरिफ शेखले दोस्रो विकेटका लागि १ सय ४५ रनको अविजित शतकीय साझेदारी गरेका थिए ।
विश्व टि–२० आईमा कुशल र दीपेन्द्रको नवौं उच्च साझेदारी हो । तेस्रो विकेटका लागि भएको यो तेस्रो उच्च साझेदारी हो ।
कुशलले ५७ बलमा आफ्नो पहिलो अन्तराष्ट्रिय शतक प्रहार गरेका गरेका थिए । कुशल नेपालबाट टि२० आईमा शतक प्रहार गर्ने तेस्रो खेलाडी बनेका छन् । कुशलअघि नेपालबाट २०१९ को १३ औं दक्षिण एसियाली खेलकुद (साग) मा भुटानविरुद्ध ज्ञानेन्द्र मल्लले ५५ बलमा १ सय ७ रनको शतकीय इनिङ खेलेका थिए ।
पारस खड्का २०१९ मा सिंगापुरविरुद्ध ५२ बलमा १ सय ६ रनको अविजित शतकीय इनिङ खेल्दै टि–२० आईमा शतक प्रहार गर्ने पहिलो नेपाली खेलाडी बनेका थिए ।