नेपाली लेखक तथा पत्रकार चेतनाथ आचार्यले चीनमा उत्कृष्ट विदेशी अनुवादक विज्ञ सम्मान प्राप्त गरेका छन् । हाल चीनमा कार्यरत लेखक तथा पत्रकार आचार्यलाई चीनका महत्त्वपूर्ण दस्ताबेजलाई नेपाली भाषामा अनुवाद गरेकोमा चिनियाँ अनुवादक संघले ‘उत्कृष्ट विदेशी अनुवादक विज्ञ सम्मान’ प्रदान गरेको हो ।
चीनको हुनान प्रान्तको सदरमुकाम छाङ्सामा आयोजित समारोहमा आचार्य सम्मानित भएका हुन् । चीनबाट यो सम्मान प्राप्त गर्ने आचार्य पहिलो नेपाली हुन् ।
नेपाली पत्रकारितामा ३ दशक लामो यात्रा गरिसकेका आचार्य विगत ११ वर्षदेखि चिनियाँ अन्तर्राष्ट्रिय रेडियो ‘सीआरआई’ नेपाली सेवामा विदेशी विशेषज्ञका रूपमा कार्यरत छन् ।
उनका आख्यान र गैरआख्यान गरी ७ वटा कृति प्रकाशित छन् । उको पछिल्लो कृति ‘नयाँ युगमा चीन’ हो ।
आचार्यले चीनमा आफूले देखेका, भोगेका र पढेका विषयलाई ‘बेइजिङ डायरी’ स्तम्भमार्फत नेपाली पाठकलाई जानकारी दिने गरेका छन् ।