सरकारले पूँजीबजार सुधारका लागि संरचनागत सुधार गर्ने घोषणा दोहोर्याएको छ । चालु आर्थिक वर्षको नीति तथा कार्यक्रममा पनि उल्लेख भएको संरचनागत सुधारको विषय आगामी आर्थिक वर्षको नीति तथा कार्यक्रममा पनि समावेश गरेको हो ।
सरकारको आगामी आर्थिक वर्षको नीति तथा कार्यक्रम सार्वजनिक गर्दै राष्ट्रपति रामचन्द्र पौडेलले पूँजीबजार सुधारका लागि संरचनागत सुधार गरिने जनाएका हुन् ।
उनले गैरआवासीय नेपालीलाई नेपालको पूँजीबजारमा लगानी खुला गरिने नीतिगत व्यवस्था गरिने पनि जनाएका छन् ।
सँगै, राष्ट्रपति पौडेलले वैदेशिक रोजगारीमा गएका नेपाली युवाहरुलाई सरकारी ऋणपत्र खरिदमा प्रोत्साहन गरिने पनि जनाएका छन् ।