पांग्रा पन्चर भएर दिल्लीमा ग्राउडेड रहेको नेपाल वायुसेवा निगमको वाइडबडी जहाज पांग्रा सापटी मागेर फर्किएका छ । बिहिबारदेखि दिल्लीमा रहेको निगमको जहाज शुक्रबार अपरान्ह ५ः५० को समयमा काठमाडौँ आइपुगेको हो ।
कतार एयरवेजले जगेडामा राखेको २ वटा पांग्रा एक दिनका लागि सापटीमा दिएपछि निगमको वाइडबडी काठमाडौँ फर्किएको हो ।
जहाजको बायाँतर्फको मेन ल्यान्डिङ गियरका चार वटा पांग्राको व्हिल–एसेम्ब्ली पन्चर भएको थियो । यसपछि कतार एयरवेजसँग भाडा तिर्ने सर्तमा पांग्रा सापटी लिइएको हो ।
ती पांग्रा शनिबार निगमको दिल्ली उडानका क्रममा लगेर कतार एयरवेजलाई दिइने छ ।
बिहिबार पांग्रामा समस्या आएपछि २५१ यात्रु दिल्लीमै रोकिएका थिए ।
यसअघि टायर पन्चर हुँदा मालीमा पनि निगमको जहाज ९ दिनसम्म रोकिएको थियो ।
