नक्कली भूटानी शरणार्थी बनाएर अमेरिका लैजाने गिरोहसँगको मिलोमतो गरी करोडौँ रकम असुलीमा संलग्न भएको आरोपमा तत्कालिन गृहमन्त्री रामबहादुर थापा (बादल)का सुरक्षा सल्लाहकार इन्द्रजीत राई पक्राउ परेका छन् ।
नक्कली शरणार्थी बनाइ अमेरिका पठाएको विषयमा अनुसन्धान गर्न उनलाई ललितपुरस्थित आफ्नै घरबाट पक्राउ गरिएको जिल्ला प्रहरी परिसर काठमाडौँका प्रहरी उपरीक्षक सिताराम रिजालले बिजपाटीलाई बताए ।
नक्कली भूटानी शरणार्थी बनाएर अमेरिका पठाउन सक्रिय रहेका एक गिरोहको खेलमा उनी मुछिएका थिए । उनका छोरा नीरजसमेत उक्त घटनामा मुछिएका छन् । उनलाई पनि प्रहरीले खोजी गरिहेको छ । अदालतबाट पक्राउ पूर्जी आदेश पाएपछि खोजी तिब्र पारिएको एक प्रहरी अधिकृत बताउँछन् ।
यद्यपि उनी भने नेपालमा नरहेको बुझिएको छ । उनले मन्त्री तथा अन्य अधिकारीहरुलाई मिलाउनुपर्छ भन्दै करोडौँ रकम लिएको प्रहरी अनुसन्धानमा खुलेको छ । प्रहरीको प्रारम्भिक अनुमानमा पटकपटक गरी पाँच करोड दिएको खुल्न आएको र अझै अनुसन्धान बाँकी नै रहेका बताइएको छ ।
ती गिरोहले विसं २०७७ सालपछि नै नक्कली शरणार्थी बनाएर अमेरिका पठाउने गैरकानूनी गतिविधि चलाएका िथए ।
पीडितहरुमध्ये १० जनाभन्दा बढीको नाममा नेपाल सरकार गृह मन्त्रालयको नाममा सरकारी लोगोसमेत प्रयोग गरी शरणार्थी परिचयपत्र तथा ट्राभल डकुमेन्टसमेत बनेको प्रमाण फेला परेको छ । सक्कली लोगो प्रयोगमा गृहका तत्कालिन अधिकारीहरु सहभागि छन् । ति मध्य राई पनि एक हुन् ।
८१ जना पीडितले अमेरिका जाने लोभमा करिब रु १३ करोड ६३ लाखभन्दा बढी रकम बुझाएका थिए । रकम फसेर अमेरिका उड्न नपाएपछि मात्रै उनीहरु अपराध अनुसन्धान कार्यालयमा आएका थिए ।
पीडितले गत जेठमै जाहेरी दिएका थिए । उक्त घटनामा संलग्न रहेको आरोपमा ललितपुरका सानु भण्डारी, मोरङका केशवप्रसाद दुलाल र पाँचथरका टङ्ककुमार गुरुङ गत चैत १२ गते पक्राउ परेका थिए । त्यसपछि सन्देश शर्मा र सागर राई पनि पक्राउ परेका थिए ।
उनीहरुले कतिपयलाई शरणार्थी समेत बनाइसकेका थिए । उनीहरुकै बयानका आधारमा आज राइ पक्राउ परेका हुन् ।
ती गिरोहले आफूसँग सम्पर्कमा आएका र चिनजानमा रहेका व्यक्तिहरुलाई प्रयोग गरी उनीहरुका आफन्त र नातागोतालाई नै शरणार्थीका नाममा अमेरिका पठाइदिन्छु भनि भुटानी शरणार्थीको नाम दर्ता गर्न भन्दै फारम भर्न लगाएका थिए । त्यसरी लोभमा फसाएर शरणार्थी फारम भर्नेहरुबाट १५ देखि २० लाख असुलेका थिए ।
अझै विश्वास दिलाउन पत्रपत्रिका र अनलाइनहरुमा आएका फोटो र न्यूजहरु तथा शरणार्थी समस्या हेर्ने विभिन्न निकायका कर्मचारीहरुको सरुवासम्बन्धी समाचारसमेत पीडितहरुलाई सेयर गरी शतप्रतिशत काम हुन्छ भनी बहाना बनाउने गरेका थिए ।
पीडितहरुलाई कहिले शरणार्थी शिविर अनुगमन हुन लागेको भन्दै त कहिले बायोमेट्रिक गर्नुपर्ने भन्दै पथरी, बेलडाँगी, विराटनगर, सौराहा, काठमाडौँलगायत स्थानमा पटक–पटक बोलाई हैरानी दिने गरेका थिए ।