यही वैशाख १८ गतेबाट चीतसँग जोडिएको महत्वपूर्ण मानिने तातोपानी नाका पनि खुला हुने भएको छ । सीमा खुलाउने विषयमा चीन र नेपालका अधिकारीहरु बीच सहमत भएका छन् । सोमबारको द्विपक्षीय बैठकले नाका खुलाउने सहमति गरेको सिन्धुपाल्चोकका प्रमुख जिल्ला अधिकारी रमेश न्यौपानेले बिजपाटीलाई जानकारी दिए ।
उनका अनुसार नेपालतर्फका प्रशासन एबं सुरक्षा निकायका प्रतिनिधि र चीनतर्फका प्रशासनिक तथा सुरक्षा निकायका प्रतिनिधि बीचको छलफलले उक्त निर्णय गरेको हो ।
बैठकमा सीमा सुरक्षा तथा कोरोना सङ्क्रमणका विषमया सुरक्षाको मापदण्ड अपनाउँदै सञ्चालन गर्ने तथा सीमा अपराधका विषयमा गम्भिरताका साथ अघि बढ्ने सहमति पनि भएको छ ।
सहमतिअनुसार दुवै देशबीच कोभिड सङ्क्रमणसम्बन्धी सावधानी अपनाउने तथा सूचना सम्प्रेषण गर्ने, अन्तरदेशीय सीमाना सुरक्षा व्यवस्था अझ बलियो बनाउने, अपराध नियन्त्रण र न्यूनीकरणमा संवेदशील रही आवश्यकतानुसार संयुक्त तालिम सञ्चालन गरिने छ ।
यस्तै गस्ती गर्ने, थप जाँच चौकी राख्ने , सीमा सुरक्षासम्बन्धी सम्पूर्ण सूचना आदान–प्रदान गर्ने, विगतमा भएजस्तै आगामी दिनमा समेत आपसी सुरक्षासम्बन्धी काम कारबाहीमा सहयोग र समन्वय गर्ने विषयमा पनि सहमति भएको छ ।
मितेरी पुलमा भएको छलफलमा नेपालबाट सिन्धुपाल्चोकका जिल्ला प्रशासन, अध्यागमन, सुरक्षा निकाय, भन्सार प्रमुख तथा चीनका न्यालम काउन्टी प्रशासन, सुरक्षा निकाय, अध्यागमनका अधिकारीको सहभागिता थियो । लामो समयदेखि नाका सञ्चालनमा आउन सकेको छैन । प्रजिअ न्यौपानेले भूकम्पलगत्तै देखि नाका नियमितमा प्रभावित हुँदै आएको बताए ।
यसअघि रसुवागढी नाका भने खुलिसकेको छ । अन्य नाका पनि खुलाउँदै लैजाने विषयमा दुई देशका अधिकारीहरु बीच यसअघि नै सहमति भएको थियो ।