सत्ता
गठबन्धनका तर्फबाट स्याङ्जा क्षेत्र नम्बर २ का नेपाली कांग्रेसका उम्मेदवार धनराज
गुरुङको चुनावी अभियानमा सक्रियताका साथ लागेका वालिङका दामोदर लम्सालसँग ग्राउण्ड
जिरो रिपोर्टिङका क्रममा रहेको बिजपाटी टीमले प्रश्न सोध्यो – 'यहाँ धनराजको
पछिल्लो अवस्था कस्तो छ ?'
'हिजो
बेलुकासम्मको रिपोर्ट हेर्दा धनराज गुरुङले जित्ने आंकडा छ,' उनले फ्याट्ट भनिहाले
।
'मतलब
प्रत्येक दिन आंकडा बदलिन्छ ?' भन्ने बिजपाटीको अर्को प्रश्नमा उनले भने, 'हो, यहाँ कडा प्रतिस्पर्धा छ । प्रत्येक दिन होइन, घण्टा-घण्टामा आंकडा परिवर्तन हुन्छ । यता-उता
आउने जाने सिलसिला चलिरहेको छ । प्रत्येक वडा र टोलबाट आफ्नो र अर्को पक्षको
रिपोर्टिङ भइरहेकै छ ।'
उनले २
दिन अघिसम्म के हो, के हो जस्तो रहेको तर हिजो बेलुकासम्म
परिस्थिति गुरुङकै पक्षमा आएको दाबी गरे ।
स्याङ्जा
क्षेत्र नम्बर २ मा गुरुङ हेविभेट उम्मेदवार हुन् । उनी नेपाली कांग्रेसका
उपसभापतिका साथै शेखर कोइराला गुटका प्रभावशाली नेता हुन् । स्याङ्जालाई आफैंमा
कांग्रेसको गढ मानिन्छ । कांग्रेसबाट नै विद्रोह गरेर कम्युनिस्ट भएकाको संख्या
पनि उल्लेख्य छ ।
गुरुङलाई
पूर्व मन्त्रीसमेत रहेकी एमालेकी सचिव पद्मा अर्यालले कडा टक्कर दिइरहेकी छन् ।
अर्यालले पटक-पटक एमाले कमजोर भएका वडाहरूबाट आफैं रिपोर्टिङ लिइरहन्छिन् ।
रिपोर्टिङ लिने क्रममा कहिले अर्यालको अनुहार उज्यालो हुन्छ भने कहिले अँध्यारो ।
अर्यालको
चुनावी अभियानमा रहेका वडा र टोलटोलका कार्यकर्ताहरूले उनलाई 'रियल टाइम सिचुएसन'
रिपोर्टिङ गर्छन् ।
हामीले
लम्साललाई सोधेकै प्रश्न नेकपा एमालेका भीरकोट नगरपालिका अध्यक्ष विश्वनाथ अर्याललाई
सोध्यौं । उनले लम्सालकै शैलीमा भने, 'एक हप्तासम्म अलि अप्ठेरो नै पर्ला कि जस्तो
थियो, तर अहिलेको पछिल्लो स्थिति हेर्दा
पद्मा अर्याललाई सहज छ ।'
उनले
कांग्रेस बलियो भएको वडाहरूमा निर्वाचन अभियान आक्रामक रूपमा चलाइएको बताए । 'गत
स्थानीय निर्वाचनमा हामीले जति पर्फर्मेन्स गर्यौं, त्यति नै कायम हुन सक्यो भने पनि पद्माको जित सहज छ,' उनले भने ।
विश्वनाथ
अर्याल गत स्थानीय निर्वाचनमा भीरकोटमा मेयरका उम्मेदवार थिए । उनी कांग्रेसका
गोविन्द कर्माचार्यसँग सानो मतान्तरले पराजित भएका थिए । विश्वनाथ त्यतिबेला आफूले
प्राप्त गरेको मत जोगाउन संघर्षरत छन् ।
दुवै
उम्मेदवारको प्रत्येक दिन मात्र होइन,
प्रत्येक घण्टा-घण्टामा ढुकढुकी बढिरहेको छ । जसको जित-हार भएपनि सानो मतान्तर
हुने निश्चित छ ।
स्याङ्जा
२ मा स्थानीय मतदाताहरू त्यति खुलेर कुरा गर्न चाहँदैनन् । वालिङका एक व्यवसायी रामबहादुर
गुरुङले भने, 'अहिले त्यसै भन्ने अवस्था छैन । अझ त्यहाँमाथि हामी व्यवसायी पर्यौं, यसैले जित्छ र हार्छ भनेर भन्ने कुरै भएन ।
प्रतिस्पर्धा कडा छ, त्यत्ति हो ।'
चुनावका
बेला स्थानीय विकास निर्माण र पूर्वाधारको कुरा जोडतोडले उठ्ने गर्छ । मतदाताहरू नदीमा
आफू नजिकै पुल खोज्छन्, आफ्नो घर नजिकै बाटो खोज्छन् ।
चुनावी एजेन्डा पनि विकास निर्माण नै बनेको छ । निकै कम मतदाताहरूले आफूले जिताएको
पठाएको सांसदले नीति निर्माण गर्ने र विकास निर्माण चाहिँ प्रदेश र स्थानीय
सरकारको काम हो भनेर बुझ्न सकेका छैनन् ।
'उ
त्यहाँ पुल जसले बनाइदिन्छ मेरो भोट त्यसैलाई हो,' भीरकोट-५ का एक मतदाताले भने,
'सांसद सहज रूपमा उपलब्ध हुनुपर्यो, विकास
निर्माणका काम गरिदिनुपर्यो,
हामीले उत्पादन गरेका कृषिजन्य वस्तुहरूको सहज विक्री हुनुपर्यो, हामीलाई कांग्रेस र एमालेसँग मतलब छैन ।'
उनले
घरदैलोमा आएका उम्मेदवारहरूसँग यसबारेमा कुरा गरेको तर दुवै उम्मेदवारले हस हस
मात्र भनेको, सिरियसली नलिएको गुनासो गरे ।
कांग्रेसको
भोट तान्न एमाले र एमालेको भोट तान्न कांग्रेसका कार्यकर्ताहरूले भरमुग्दर प्रयास
गरिरहेका छन् । अहिलेसम्म कुनै आर्थिक प्रलोभन दिइएको छ कि नाई भनेर सिर्सेकोटका
एक युवालाई सोधेको प्रश्नमा उनले मुन्टो हल्लाए ।
'खै,
अहिलेसम्म मैले त्यस्तो सुनेको छैन,' आफ्नो टोलका खेलकूदमा प्रत्यक्ष सहभागिता र
नेतृत्व पनि गर्ने उनले भने, 'पैसाको हल्ला चल्ने गरेको छ तर हामीसम्म त्यो आएको
छैन । आए पनि हामी त्यस्तो प्रलोभनमा फँस्दैनौं ।'
