.gif)
दशैँमा घर फर्किने सर्वसाधारणका लागि लक्षित गर्दै सरकारले आजबाट देशभर लागू हुने गरी रुट परमिट खुला गरेको छ । असोज २३ गतेसम्म लागू रहने गरी आजबाट जुनसुकै सार्वजनिक सवारी जुनसुकै रुटमा पनि चल्न पाउने गरी रुट परमिट खुलाइएको हो ।
यातायात व्यवस्था विभागले बाटो (सडक) का कारण भारबहन क्षमता तोकेर निषेध गरिएका आकार र प्रकारका सवारीसाधन बाहेकलाई आजबाट देशभरका रुटमा परमिट दिईएको जनाएको छ ।
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले यसपाली दशैँमा काठमाडौँ उपत्यकाबाट २० लाख बढी मानिसहरु बाहिरिने अनुमान गरिएको बताएका छन् ।
दशैँका लागि यात्रुबाहक सवारीसाधनले पहिलो प्राथमिकता पाउने भएपछि अति आवश्यक सामान बोक्नेबाहेक सवारीसाधनलाई निषेध गरिएको छ । विभागले असोज १५ बाट २२ गतेसम्म नारायणगढबाट काठमाडौँसम्म ठूला मालबाहक सवारी सञ्चालनमा रोक लगाउने निर्णय गरेको छ ।
.gif)
