नेपाल उद्योग वाणिज्य महासंघका केन्द्रीय सस्दय अरुणराज सुमार्गी जिल्ला नगर उपाध्यक्षमा चुनाव लड्ने गरी आन्तरिक गृहकार्य गरिरहेका छन् । संस्थापन पक्षबाटै महासंघमा प्रवेश गराइएका सुमार्गी अहिले पनि आफूलाई संस्थापन समूहकै उम्मेदवार हुने दाबी गर्छन् ।
गत निर्वाचनमा शेखर गोल्छाले समर्थन गरेको समूहबाट केन्द्रीय सदस्यमा निर्वाचित भएका उनी यसपाली पनि संस्थापन पक्षबाटै जिल्ला नगर उपाध्यक्षमा चुनाव लड्ने तयारी गरिरहेका छन् । हाल महासंघको कृषि उद्यम केन्द्रका सभापति रहेका उनीसँग हामीले उनको दशैँ तयारीबारे हामीले कुराकानी गरेका छौँ ।
सुमार्गी परिवारले २०८० बैशाख १ गतेबाट मकवानपूरमा ठूलो यज्ञ लगाउँदैछ ।
हरेक पाँच पाँच वर्षमा सबै समुदायका व्यक्तिहरुसँग जमघटका लागि यज्ञ र भण्डारा लगाउँदै आएको सुमार्गी परिवारले राप्ती नदीको तटस्थित गोरक्षश्वर धाममा यज्ञ लगाउँदै छ । यो धामको संरक्षक अजयराज सुमार्गी हुन् । अजय सुमार्गी अरुणका दाइ हुन् ।
त्यसैले सुमार्गी परिवार यसपालीको दशैँमा बाहिर कतै घुम्न नजाने भएको छ ।
‘हामीले ५/५ वर्षमा यज्ञ लगाउँछौँ, यसपाली बैशाख १ गतेबाट ७ दिन लगाउँदै छौँ’ अरुणराज सुमार्गीले भने, ‘जिल्लाभरीका दाजुभाइ दिदीबहिनी सँगको भेटघाटको अवसरका लागि हामी प्रत्येक ५/५ वर्षमा यस्तो यज्ञ लगाउँछौँ । यसपालीको दशैँमा त्यसैको तयारी गर्छौँ, बाहिर कतै घुम्न जाँदैनौँ ।’
उनका अनुसार यज्ञको सुरुमा विशाल र्याली निकालिन्छ । र्यालीमा हिन्दु, बौद्ध, मुस्लिम लगायत सबै धर्म मान्ने महिला दिदीबहिनीहरु सहभागी हुनेछन् । महिला दिदीबहिनीहरुलाई साडी बाँडिन्छ ।
‘हामीले यसरी हजारौँ दाजुभाइ दिदीबहिनीसँग एकैपटक साक्षात्कार गर्छौँ, त्यहाँ थालमा होइन टपरीमा खाना खुवाइन्छ’ अरुणले भने, ‘यसअघि हामीले प्रचण्ड, कृष्ण सिटौला र उपेन्द्र महतोसम्मलाई टपरीमा खाना खुवाइसक्यौँ ।’
सुमार्गीले यसपाली दशैँको अवधिमा स–परिवार मिलेर यसैको तयारीमा लाग्ने बताएका छन् । उनको दशैँ हेटौँडामा हुन्छ ।
