उद्योग, वाणिज्य तथा आपूर्तिमन्त्री दिलेन्द्रप्रसाद बडूले पदभार ग्रहण गरेका छन् । मन्त्री बडूले सिंहदरबार पुगेर पदभार ग्रहण गरेका हुन् ।
पदभार ग्रहण गर्दै उनले साना तथा मझौला उद्योग महाशाखा गठन गर्ने निर्णय गरेका छन् । यसका लागि मन्त्रालयका सहसचिवको नेतृत्वमा कार्यदल गठन गर्ने निर्णयमा हस्ताक्षर पनि गरेका छन् ।
उनले आयात र निर्यातलाई सन्तुलित राख्न तात्कालिक र दीर्घकालीन योजना बनाउने पनि बताएका छन् ।
प्रधानमन्त्री शेरबहादुर देउवाको सिफारिसमा राष्ट्रपति विद्या भण्डारीले आज बडूलाई उद्योग मन्त्रीको जिम्मेवारी तोकेकी थिइन् ।
बडूले असोज २२ देखि कानुन, न्याय तथा संसदीय मामिला मन्त्रालयमा जिम्मेवारी सम्हाल्दै आएका थिए ।
