नेपाल स्टक एक्सचेन्ज नेप्सेमा घोराही सिमेन्टको शेयर कारोबार सुरु भएको छ । आज आइतबार नेप्सेको स्पेसल प्रि ओपन सेसनमा पहिलो कारोबार भई मूल्य तय भएसंगै कम्पनीको कारोबार सुरु भएको हो ।
कम्पनीको पहिलो कारोबार ५६५.५ रुपैयाँ भएको छ । नेप्सेले कम्पनीको पहिलो कारोबारको लागि २२६.६१ रुपैयाँ देखि ६७९.८३ रुपैयाँसम्मको सुरुवाती रेन्ज तोकेको थियो । यस रेन्जको जुनसुकै मूल्यमा पहिलो कारोबार हुने सक्ने व्यवस्था रहेकोमा ५६५.५ रुपैयाँबाट कारोबार सुरु भएको हो । कम्पनीको GCIL सिम्बलबाट कारोबार भएको हो । गत बिहिबार कम्पनीको ३ करोड ९७ लाख १९ हजार ६ कित्ता शेयर सुचिकृत भएको थियो ।
कम्पनीले सर्वसाधारणलाई अंकित मूल्य १०० रुपैयाँमा ३३५ रुपैयाँ प्रिमियम थपेर प्रति शेयर ४३५ रुपैयाँमा शेयर निष्काशन गरेको हो । कम्पनीले सर्वसाधारणलाई कुल ६९ लाख ११ हजार ६ सय ७० कित्ता शेयर निष्काशन गरेको हो । कम्पनीले जेठ ३२ गतेदेखि सर्वसाधारणलाई शेयर निष्काशन गरेको थियो । नेपाल धितोपत्र बोर्डको निर्देशनमा असार ४ देखि कम्पनीको आईपीओ स्थगित भएको थियो । फेरि बोर्डको निर्देशनमा असार २२ गतेदेखि आवेदन फिर्ता लिने, र आवेदन दिएकोको हकमा कित्ता थपघट गर्न सक्ने विकल्प सहित आवेदन पुन: खुला भएको थियो ।
आईपीओमा कुल ५ लाख ८१ हजार ५ सय ४६ जना आवेदकबाट १ करोड ३ लाख २४ हजार २ सय ६० कित्ताको लागि आवेदन परेको थियो । जस मध्ये ५ लाख ५७ हजार ७ सय १ जना आवेदकको आवेदन मात्र योग्य रहेका थिए । आवेदन दिएका सबै आवेदकले शेयर पाएका थिए। आवेदकले न्युनतम १० देखि अधिकतम ८० कित्तासम्म शेयर पाएका थिए ।
शेयर बाँडफाँड मोडल अनुसार १० कित्ता देखि ७० कित्तासम्मको लागि आवेदन दिने ५ लाख ५३ हजार ४४ जना आवेदकले माग गरे बमोजिम कै शेयर पाएका छन् । त्यस्तै ८० कित्ता देखि ३० हजार कित्ताको लागि आवेदन दिने ४ हजार ६ सय ५७ जनाले समान ७० कित्ता शेयर पाएका छन् । बाँकी रहेको ६ हजार ९ सय १० कित्ता शेयर गोलाप्रथा मार्फत बाँडफाँड गरिएको छ । जस अनुसार ७० कित्ता शेयर पाएका ४ हजार ६ सय ५७ जना मध्येबाट ६ सय ९१ जनाले थप १० कित्ताको दरले शेयर पाएका छन् । यस हिसाबमा लगानीकर्ताले कुल ८० कित्ता सम्म शेयर पाएका छन् ।
