फिफा विश्वकप तथा एएफसी एसिया कप छनोटअन्तर्गत नेपालले आज जोर्डनसंग खेल्दै छ । खेल नेपाली समय अनुसार आज सोमबार बेलुका ९:४५ बजे सुरु हुने छ ।
नेपालीले यस अघिको खेलमा चाईनेज तापेई बिरुद्द २-० गोल अन्तरको जित निकालेको थियो । तर जोर्डन निकै बलियो टोली हो । जोर्डनको फिफा बरियतामा ९५ औं स्थानमा छ भने नेपाल १७१ औ स्थानमा छ । त्यसो त नेपालले पराजित गरेको चाइनिज तापेईको फिफा बरियता नेपालभन्दा माथि अर्थात् १४१ औ स्थानमा थियो ।
नेपाल टिममा मुख्य प्रशिक्षक अब्दुल्लाह अल्मुतारीले नेपालले जितको लागि खेल्ने बताएका छन् । जोर्डन बलियो टिम रहेको र नेपाललाई सबैले अन्डर डगको रुपमा लिएपनि सबै खेल ०-० को अवस्थामा सुरु हुने भएकोले जितको लागि खेल्ने रणनीति अपनाउने बताएका छन् ।
सोहि अनुसार उनले अघिल्लो खेलको तुलनामा टिममा केहि परिवर्तन गरेका छन् । आजको खेलमा उनले अभिषेक रिजाल, विकाश खवास र दिनेश राजबंशीलाई सुरुवाती ११ मा स्थान दिएका छन् । यसअघिको खेलमा उनीहरु पहिलो ११ मा थिएनन् । यस अघिको खेल खेलेका सुनिल बल, आशिष लामा र गौतम श्रेष्ठ सुरुवाती ११ मा परेका छैनन्। आजको खेलपछि नेपालले जेठ २८ गते अस्ट्रेलियासँग खेल्ने छ ।
खेलको प्रत्यक्ष प्रसारण कान्तिपुर टिभी मार्फत हेर्न सकिने छ ।