रियल मड्रिडले स्पेनिस ला लिगामा विजयी सुरुवात गरेको छ । अलाभेजलाई ४–१ को फराकिलो अन्तरले पाखा लगाउँदै रियलले पहिलो ३ अंक जोडेको हो ।
अलाभेजको मैदानमा भएको खेलमा पहिलो हाफ गोलरहित बराबरीमा सकिएको थियो । दोस्रो हाफमा दुबै टिमका तर्फबाट गरी कुल ५ गोल भए ।
रियलका लागि करिम बेन्जामाले ४८औं र ६२औं मिनेटमा गोल गरे भने नाचो फर्नान्डेजले ५६औं र भिनिसियस जुनियरले थप गरिएको समयमा गोल गरे । अलाभेजका लागि जोसेलुले ६५औं मिनेटमा पेनाल्टीमा गोल फर्काएका थिए ।
गए राती नै भएको अर्को खेलमा लेभान्टे र काडिज तथा मालोर्का र रियल बेटिसले समान १–१ को बराबरी खेल्दै अंक बाँडेका छन् ।
ला लिगामा साविक विजेता एट्लेटिको मड्रिडले आज राति सेल्टा भिगोसँग र बार्सिलोनाले रियल सोसिडाडसँग खेल्नेछ ।