भारतसँगको दोस्रो मैत्रीपूर्ण खेलमा नेपाल पराजित भएको छ । त्रिपुरेश्वरस्थित दशरथ रंगशालामा भएको दोस्रो खेलमा नेपाल भारतसँग २-१ गोल अन्तरले पराजित भएको हो ।
पहिलो हाफको खेल गोल रहित बराबरीमा सकिएको थियो । दोस्रो हाफमा भारतका लागि फारुख चौधरी र सुनिल क्षेत्रीले एक-एक गोल गरेका थिए । फारुख चौधरीले ६२ मिनेटमा गोल गरे भने सुनिलले ८० मिनेटमा गोल गरेका थिए ।
दोस्रो हाफमा दुई गोलले पछि परेको स्थितिमा नेपालले गोल फर्काएको हो । नेपालका मिडफिल्डर तेज तामाङले गोल गरेका थिए। थप गोल हुन नसकेपछि नेपाल दोस्रो खेलमा पराजित भएको हो।
पहिलो खेलमा भने नेपाल र भारतले १-१ को बराबरी खेलेका थिए । आगामी साफ च्याम्पियनसिपको तयारीस्वरुप नेपाल र भारतले मैत्रीपूर्ण खेल आयोजना गरिएको हो।