रियल मड्रिड ला लिगाको शीर्ष स्थानमा फर्किएको छ । शनिबार राति भएको खेलमा रायो भालेकानोलाई २–१ ले हराउँदै रियल मड्रिड शीर्ष स्थानमा फर्किएको हो ।
सान्टिएगो बेर्नाबाउमा भएको खेलमा घरेलु टोलीले १४औं मिनेटमा टोनी क्रुजको गोलबाट अग्रता लिएको थियो । खेलको ३८औं मिनेटमा करिम बेन्जिमाले गोल गर्दै रियल मड्रिडलाई पहिलो हाफमा २–० को अग्रता दिलाए ।
दोस्रो हाफमा रोयो भालेकानोका लागि ७६औं मिनेटमा फल्काओले गोल गरे । इन्जुरी समयमा भालेकानोले बराबरी गोल फर्काउन उत्कृष्ट प्रयास गरेपनि गोल गर्न नसक्दा बराबरी गर्नबाट चुक्यो ।
जितसँगै रियल लिगको शीर्ष स्थानमा फर्किएको छ । १२ खेलबाट २७ अंक जोडेको रियल मड्रिड दोस्रो स्थानमा रहेको रियल सोसिडाडभन्दा २ अंकले अगाडी छ । समान खेलबाट २० अंक जोडेको भालेकानो छैटौं स्थानमा काययमै छ ।
