यस वर्षको वसन्त ऋतुको सिजनमा सगरमाथा आरोहणका लागि ३५२ आरोहीले अनुमति लिएका छन् । पर्यटन विभागका अनुसार ३३ आरोही समूहका ६५ महिला र २८७ पुरुष गरी ३५२ आरोहीले सगरमाथा आरोहणको अनुमति लिएका हुन् ।
उनीहरु विभिन्न ५५ देशका नागरिक हुन् ।
अघिल्लो वर्ष हालसम्मकै सर्वाधिक ४७८ आरोहीले सगरमाथा आरोहण अनुमति लिएका थिए ।
सगरमाथासहितका विभिन्न २४ हिमाल आरोहण अनुमतिबापत चालु वर्षको हालसम्म ५६ करोड ४० लाख ३१ हजार १८१ रुपैयाँ राजस्व संकलन भएको विभागले जनाएको छ । विभागको साहसिक पर्यटन तथा पर्वतारोहण शाखाका निर्देशक राकेश गुरुङका अनुसार यो सिजनमा ४०० बढी आरोही आउने अनुमान गरिएको छ ।
