बजेट र बजेट सम्बन्धित ३ वटा अध्यादेश संसदमा पेश भएका छन् । अर्थ मन्त्री जनार्दन शर्माले आज बसेको प्रतिनिधि सभा बैठकमा बजेट सहितका ३ वटा अध्यादेश पेश गरेका हुन् ।
मन्त्री शर्माले आर्थिक अध्यादेश, २०७८, विनियोजन अध्यादेश, २०७८, र राष्ट्र ऋण उठाउने अध्यादेश, २०७८ पेश गरेका हुन् । संसद विघटन भएकोले सरकारले अध्यादेश मार्फत आर्थिक वर्ष ७८/७९ को बजेट ल्याएको थियो । अर्थ मन्त्री विष्णु पौडेलले अध्यादेश मार्फत ल्याईएको बजेट सार्वजनिक गरेका थिए । संसद नहुँदाको अवधिमा आएका आध्यादेशहरु त्यसपछि बस्ने पहिलो बैठकमा पेश गर्नु पर्ने प्रावधान अनुसार आजको बैठकमा पेश भएको हो ।
संविधानको धारा ११४ को उपधारा (१) बमोजिम नेपाल सरकार, मन्त्रिपरिषद्को सिफारिसमा राष्ट्रपतिले अध्यादेश जारि गर्ने संवैधानिक प्रावधान छ । संसद नहुँदाको अवधिमा जारी भएका सबै अध्यादेश आजको बैठकमा पेश भएका छन् । संवैधानिक परिषद् सम्बन्धि आध्यादेश भने सरकारको सिफारिसमा राष्ट्रपतिबाट खारेज भएको छ ।