नेपाल बीमा प्राधिकरणले एनएलजी इन्स्योरेन्सलाई हकप्रद निष्काशनको लागि स्वीकृति प्रदान गरेको छ । प्राधिकरणको गत शुक्रबारको बैठकले कम्पनीलाई हकप्रद निष्काशनको लागि स्वीकृति प्रदान गरेको प्राधिकरणका कार्यकारी निर्देशक राजुरमण पौडेलले जानकारी दिए ।
प्राधिकरणका प्रवक्ता समेत रहेका पौडेलले कम्पनीलाई ६८ प्रतिशत हकप्रद निष्काशनको लागि स्वीकृति दिइएको बताए । एनएलजी इन्स्योरेन्स फरक प्रकृतिको कम्पनी भएकोले हकप्रद निष्काशनको लागि अनुमति दिएको उनले बताए ।
उनले भने 'एनएलजी इन्स्योरेन्स नेशनल लाइफ इन्स्योरेन्सको सहायक कम्पनी कम्पनी हो , फरक प्रकृतिको कम्पनी भएकोले कम्पनीको माग बमोजिम हकप्रद निष्काशनको लागि स्वीकृति प्रदान गरिएको हो'।
एनएलजी इन्स्योरेन्समा नेशनल लाइफ इन्स्योरेन्सको ५० प्रतिशत शेयर स्वामित्व रहेको छ । त्यस्तै सिद्धेश्वर कुमार सिंहको २.५५ प्रतिशत, रण बहादुर शाहको १.३८ प्रतिशत, राष्ट्रिय वाणिज्य बैंकको २ प्रतिशत , तथा तेजश्वी राजेश्वरी राणाको १.१२ प्रतिशत शेयर स्वामित्व रहेको छ ।