संस्कृति, पर्यटन तथा नागरिक उड्डयनमन्त्री सुदन किरातीले आज बिहिबार बिहान त्रिभुवन अन्तराष्ट्रिय विमानस्थलको अनुगमन गरेका छन् । यो उनले त्रिभुवन अन्तराष्ट्रिय विमानस्थलमा गरेको तेस्रो अनुगमन हो ।
बिहानै ५ः३० बजेको सयमा विमानस्थल पुगेका मन्त्री किरातीले यसअघि आफूले अनुगमनका क्रममा दिएको निर्देशन अनुसार काम भएको वा नभएको र त्यसअनुसार के केति सुधार भयो वा भएन भनेर अनुगमन गरेका हुन् ।
यसअघि आउँदा र आज आउँदा तुलनात्मक रुपमा केही सुधार देखिएको र यसले खुशी मिलेको मन्त्री किरातीको भनाई छ ।
‘यो नै पूर्ण सुधार होइन, तर, क्रमिक सुधार भएको छ, यसबाट म आंशिक सन्तुष्ट छु’ मन्त्री किरातीले भने, ‘२४ सै घण्टा खटेर एयरपोर्टलाई सुन्दर बनाउने ब्युटिसियनहरुलाई म विशेष धन्यवाद भन्न चाहन्छु ।’
यात्रुहरुको गुनासोका लागि क्युआर कोड सञ्चालनमा ल्याइनु र शौचालयमा म्युजिक जडान गरिनु केही सुधारका संकेत भएको उनको दाबी छ । अहिले हरेक ३०/३० मिनेट (आधा आधा घण्टा)मा शौचालय अनुगमनको व्यवस्था पनि एयरपोर्टमा गरिएको छ । मन्त्रीको यसअघिको निर्देशनकै आधारमा यो प्रवन्ध मिलाइएको बताइन्छ ।
मन्त्री किरातीले ५ सय वटा ट्रलीको मूल्यांकन गरी आर्थिक प्रस्तावसमेत तयार गर्न निर्देशन दिएर फर्किएका छन् ।
त्यस्तै, १५ सय वटा चक्का लगायतका पार्टस् खरिदका लागि बोलपत्र आह्वान पनि गरिएको छ । यसअघि बिग्रिएका ट्रलीहरु असरल्ल छरिएकोमा अहिले त्यस्ता ट्रलीको चक्का मर्मत गरेर सञ्चालन गरिएको पाइएको मन्त्री किरातीले बताए ।
विमानस्थल अनुगमनबाट फर्किने क्रममा मन्त्री किरातीले सुरक्षा जाँचका लागि स्क्यानरको प्रवन्ध गर्न विमानस्थल व्यवस्थापनलाई भनेका छन् ।
मन्त्रीसँगै, नागरिक उड्डयन प्राधिकरणका महानिर्देशक प्रदीप अधिकारी पनि विमानस्थल पुगेका थिए ।
