आज अपरान्ह काठमाडौँमा प्रतिकूल मौसमका कारण हवाई उडान प्रभावित भएको छ । हावाहुरीका कारण त्रिभुवन अन्तर्राष्ट्रिय विमानस्थलबाट हुने आन्तरिक र अन्तर्राष्ट्रिय दूबै उडान प्रभावित भएको विमानस्थलका प्रवक्ता सुवास झाले जानकारी दिए ।
प्रवक्ता झाका अनुसार आन्तरिक उडानका जहाज ‘डाइभर्ट’ भएका छन् भने अन्तर्राष्ट्रियतर्फ केही जहाज आकाशमा ‘होल्ड’ भएका छन् । केही जहाज विभिन्न गन्तव्यमा डाइभर्ट भएका छन् ।
नेपालगञ्जबाट काठमाडौँ आएको बुद्ध एयरको जहाज भैरहवा डाइभर्ट भएको छ भने सिमराबाट काठमाडौँ आइरहेको बुद्धकै जहाज सिमरा नै फर्किएको छ । काठमाडौँबाट पोखरा जान लागेको यती एयरलाइन्सको जहाज काठमाडौँ नै फर्किएको छ।