नेपाल राष्ट्र बैंकले ५० रुपैयाँ दरका ३० करोड थान बैंक नोट छाप्ने जिम्मा भारतीय सरकारी कम्पनीलाई दिएको छ । भारत सरकारको स्वामित्व रहेको भारत प्रतिभूति मुद्रण तथा मुद्रा निर्माण निगम लिमिटेड (सेक्युरिटी प्रिन्टिङ एन्ड मिन्टिङ कर्पोरेसन अफ इन्डिया लिमिटेड) लाई नोट छपाइका लागि ठेक्का दिन लागिएको हो ।
राष्ट्र बैंकले बुधबार उक्त ठेक्का सम्झौता गर्नेसम्बन्धी आशयपत्र जारी गरेको छ । ५० रुपैयाँ दरका ३० करोड थान नोटको डिजाइन, छपाइ र ढुवानीको काम भारतीय कम्पनीले नै गर्नेछ । यसका लागि उसले ५० लाख ४८ हजार ७ सय ८० डलर १७ सेन्ट्स (मंगलबारको विदेशी विनिमय दरअनुसार रु ६६ करोड २२ लाख १२ हजार) बराबर कबोलेको थियो ।