नेपाल राष्ट्र बैंकले फागुन मसान्तसम्म १८७२ अर्ब ८२ करोड रुपैयाँ विदेशी विनिमय सञ्चिति रहेको जनाएको छ । २०८० असार मसान्तमा रु.१५३९ अर्ब ३६ करोड बराबर रहेको कुल विदेशी विनिमय सञ्चिति २०८० फागुन मसान्तमा आउँदा २१.७ प्रतिशतले वृद्धि भई रु.१८७२ अर्ब ८२ करोड पुगेको राष्ट्र बैंकले जनाएको छ ।
अमेरिकी डलरमा यस्तो सञ्चिति २०८० असार मसान्तमा ११ अर्ब ७१ करोड रहेकोमा २०८० फागुन मसान्तमा २०.८ प्रतिशतले वृद्धि भई १४ अर्ब १४ करोड पुगेको राष्ट्र बैंकको तथ्यांकले देखाएको छ ।
कुल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति १६४४ अर्ब ६ करोड पुगेको छ भने बैंक तथा वित्तीय संस्था (नेपाल राष्ट्र बैंक बाहेक) सँग २२८ अर्ब ७६ करोड पुगेको राष्ट्र बैंकको भनाइ छ ।
२०८० फागुन मसान्तको कुल विदेशी विनिमय सञ्चितिमा भारतीय मुद्राको अंश २२.१ प्रतिशत रहेको छ ।
आर्थिक वर्ष २०८०÷८१ को आठ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चितिले १४.८ महिनाको वस्तु आयात र १२.४ महिनाको वस्तु तथा सेवा आयात धान्न पर्याप्त रहने देखिएको राष्ट्र बैंकले जनाएको छ ।
माघ मसान्तसम्म १८४४ अर्ब ९४ करोड रुपैयाँ विदेशी विनिमय सञ्चिति थियो ।
