सिनर्जी पावर डेभलपमेन्ट लिमिटेडको १७ औ साधारणसभा सम्पन्न भएको छ । आज आइतबार कम्पनीका अध्यक्ष इन्द्र बहादुर थापाको अध्यक्षतामा कम्पनीको आर्थिक वर्ष २०७९/८० को साधारणसभा सम्पन्न भएको हो ।
साधारणसभाले सञ्चालक समितिकोतर्फबाट अध्यक्षबाट पेश भएको आ.व. २०७९ / ०८० को वार्षिक आर्थिक विवरण सहितको वार्षिक प्रतिवेदन पारित गरेको छ। त्यस्तै आ.व.२०७९/०८० को लेखापरीक्षकको प्रतिवेदन र सोही आ.व. को वार्षिक वित्तीय विवरण अन्तर्गत वासलात, नाफा नोक्सान हिसाब, नगद प्रवाह विवरण, इक्वीटीमा भएको परिवर्तन र सोसँग सम्बन्धित सम्पूर्ण अनुसूचिहरु स्वीकृति गर्ने प्रस्ताव पनि साधारणसभाले पारित गरेको छ। साधारणसभाले आ.व.२०८०/०८१ को लागि लेखापरीक्षक नियुक्त गर्ने र निजको पारीश्रमिक तोक्ने प्रस्ताव पनि पारित गरेको छ।
साधारणसभामा शेयरधनीले उठाएका जिज्ञासाको जवाफ कम्पनीका अध्यक्ष इन्द्र बहादुर थापाले दिएका थिए । उनले यस वर्ष अडिटरका कारण साधारणसभा गर्न केहि ढिलाई भए पनि पुस मसान्त भित्रै साधारणसभा सम्पन्न गर्न सफल भएको बताए । उनले अघिल्लो वर्ष सुचिकृत कम्पनी मध्ये सबैभन्दा पहिले साधारणसभा गरेको पनि स्मरण गराए । उनले आगामी वर्ष छिट्टै नै साधारणसभा गर्ने प्रतिवद्दता जनाए ।
अध्यक्ष थापाले यस वर्ष लाभांश दिन सक्ने अवस्था रहे पनि सो रकमले ऋण तिरेकोले आगामी वर्ष देखि दिगो लाभांश दिने प्रतिवद्दता व्यक्त गरेका छन् । उनका अनुसार कम्पनीको कुल ऋण ६७ करोड रहेकोमा अहिले घटेर २९ करोड मात्र रहेको र यो वर्ष थप ५ देखि ७ करोड ऋण तिर्ने उनले बताए । त्यस्तै उनले ऋण घट्दै गएको र कम्पनीले लगानी गरेको २२ मेगावाटको 'मध्य होङ्गु खोला जलबिद्युत आयोजना' बाट राम्रो प्रतिफल पाउने भएकोले आगामी वर्ष राम्रो लाभांश दिने बताए । अहिले सिप्रिन खोला आयोजनामा गरिएको लगानी भन्दा कम्पनीले लगानी गरेको २२ मेगावाटको 'मध्य होङ्गु खोला जलबिद्युत आयोजना' बाट धेरै आम्दानी हुने उनले उल्लेख गरे ।
कम्पनीले हालै ५० प्रतिशत हकप्रद निष्काशन गरेर सो बाट आएको रकम 'मध्य होङ्गु खोला जलबिद्युत आयोजना' बनाई रहेको एपेक्स मकालु कम्पनीमा लगानी गरेको हो।
