एक दिवसीय विश्वकपको ग्लोबल छनौट खेल्ने १० मध्ये ९ टिमको टुंगो लागेको छ । आज क्वालिफायर प्ले अफ अन्तर्गत भएको खेलमा अमेरिका र नामिबिया विजय भएसँगै क्वालिफायर प्ले अफबाट छनौट हुने २ टिम टुंगो लागेको छ ।
क्वालिफायर प्ले अफ बाट अमेरिका र युएईले ग्लोबल छनौट खेल्ने भएका छन् । प्ले अफमा आजको जित सहित अमेरिकाको ८ अंक भएको छ, ८ अंक सँगै अमेरिका छनौट भएको छ । भोलि युएईले जर्सीसँग तथा क्यानाडाले पीएनजी सँग खेल्ने छ । अन्तिम खेल अघि नै युएईको ६ अंक छ । अन्तिम खेल जितेमा युएई ८ अंक सहित छनौट हुने छ । तर अन्तिम खेल हारे पनि युएई छनौट हुने छ । युएईले अन्तिम खेल हारेमा युएई र नामिबियाको बराबर ६ अंक हुन्छ । प्रतियोगिताको नियम अनुसार अंक बराबर भए धेरै खेल जितेको टिम अगाडी जान्छ । तर दुवै टिमले समान ३ खेल जितेको हुने छ। त्यस्तो अवस्थामा जुन जुन टिमको अंक बराबर भएको हो ति बीच भएको खेलको विजेता अगाडी जान्छ । यसो हुँदा युएईले नामिबियालाई हराएको कारण युएई अगाडी जाने छ । यदि क्यानडाले आफ्नो अन्तिम खेल जितेमा क्यानडाको पनि ६ अंक नै हुन्छ तर क्यानडालाई पनि युएईले हराएको कारण युएई नै अगाडी जान्छ ।
अर्थात् नामिबियामा भएको क्वालिफायर प्ले अफबाट अमेरिका र युएई विश्वकप ग्लोबल छनौटमा जाने पक्का भएको छ।
हेर्नुस् आईसीसीको नियम, जुन आईसीसीले आजको खेल अगाडी गरेको रिभ्युमा हेर्न सकिन्छ सो रिभ्यु हेर्न यहाँ क्लिक गर्नुहोला ।
लिग टु को शिर्ष स्थानमा रहेको कारण सक्टल्याण्ड, ओमान र नेपाल पनि विश्वकप ग्लोबल छनौटमा जाने पक्का भएको छ ।
सुपर लिगमा पुछारमा हुने ५ टिम पनि विश्वकप ग्लोबल छनौटमा जाने छन् । यस अन्तर्गत हालसम्म नेदरल्याण्ड , श्रीलंका, वेस्ट इन्डिज र जिम्बावे सुपर लिगको पुछारको ५ मा रहदै विश्वकप ग्लोबल छनौटमा जाने पक्का भएको छ । अब आयरल्याण्ड र साउथ अफ्रीका मध्ये बाट १ टिम विश्वकप ग्लोबल छनौटमा जाने पक्का छ । यदि आयरल्याण्डले बंगलादेशसँग हुने ३ खेल मध्ये ३ खेल नै जितेमा आयरल्याण्ड सिधै विश्वकपको लागि छनौट छ र साउथ अफ्रीका विश्वकप ग्लोबल छनौट खेल्न आउने छ । तर आयरल्याण्डले ३ वटै खेलमा बंगलादेशलाई हराउँन सकेन भने साउथ अफ्रीका सिधै विश्वकपको लागि छनौट हुने छ र आयरल्याण्ड विश्वकप ग्लोबल छनौट खेल्न आउने छ ।
ग्लोबल छनौट आगामी जुन १८ देखि जुलाई ९ सम्म हुने छ । सो प्रतियोगितामा टेस्ट खेल्ने राष्ट्र हरु सहित १० देश हुने छन् । ग्लोबल छनौट जिम्बावेमा हुने छ । १० देश सहभागी उक्त प्रतियोगिताको शिर्ष २ मा पर्न सके नेपालले भारतमा हुने एक दिवसिय विश्वकप खेल्न पाउने छ ।
समग्रमा विश्वकप छनौट खेल्ने देशहरु: नेदरल्याण्ड, श्रीलंका, वेस्ट इन्डिज, जिम्बावे, साउथ अफ्रीका वा आयरल्याण्ड मध्ये एउटा, नेपाल, ओमान, स्कटल्याण्ड, अमेरिका र युएई ।
सबै टिमले राउण्ड रोबिन आधारमा सबै टिमसँग एक एक खेल खेल्ने छन् र प्रतियोगिताशिर्ष स्थानमा रहने २ टिम भारतमा हुने एक दिवसीय विश्वकपको लागि छनौट हुने छन् ।
